CM's Award leh Proficiency Award sem Minister-in selection test ti lo turin a hriattir

HSLC leh HSSLC-a ti ṭha berte hnena pek ṭhin, Chief Minister's Award 2015 leh Proficiency Award 2015-te chu Thawhlehni zan khan Lal Thanhawla Auditorium, Congress Bhavan-ah sem a ni.

Award semnaa khuallian, School Education minister H Rohluna chuan, board exam hmachhawn tur thlanna, selection test/exam buatsaih tawh lo turin sikul tinte a hriattir.

School Education Minister chuan, HSLC-ah private-a exam an tam tial tial chu siamṭhat a ngai tih sawiin, "Selection-ah inpaih loh tur a ni. Zirlaite kumtluana an zirna hmáwrbàwkna turah exam thei loa insiam hi a dik lo... Zirlai chak lo zawkte chhawk vanga cent percent result nei kan ni em tih inenfiah a ngai a, sikul ṭha tehna hi a dik em tih inenfiah a ngai," a ti.

H Rohluna chuan, kumin HSLC-a zirlai pass awm miah lohna sikulte chu enfiah a ṭul thu sawiin, sikul tinte'n nakkumah result ṭha zawk an neih theih nan zirtirtute an ṭan nasat a ngaih thu a sawi a, "Thiamna tak tak pe turin zirtirtute'n ṭan an lak a pawimawh a ni," a ti a; nu leh pate pawhin an fate zirnaah nasa lehzuala an ṭanpuia an ṭawiawm a ṭul thu a sawi.

Minister H Rohluna chuan, Mizoram sorkar leh chief minister-in zirna an ngaih pawimawh avangin Chief Minister's Award siam a ni tih sawiin, Chief Minister's Award leh Proficiency Award dawngtute chu dinhmun sang lehzual chang thei tura ṭang zel turin a chah a; kum lo kal leh tura HSLC leh HSSLC exam hmachhawn turte pawh Award dawng pha tura ṭang tur leh, zirlai hlawhtling rih lote pawh beidawng loa nasa lehzuala zir turin a fuih a ni.

Khualzahawm, parliamentary secretary (School Education) Joseph Lalhimpuia chuan, Education Service Rules leh hostel enkawlnaa dan hman tur Hostel Rules buaipui mek a nih thu sawiin, "Peih thuai beisei a ni," a ti a; kumin aṭangin primary school thlan bikah pre-primary school kalpui ṭan a nih thu leh zirlai sang chuang an awm thu a sawi. (phek 2-naah chhunzawm)