Special Blind School-in HSLC pass-te lawmpui

Samaritan Association for the Blind enkawl Special Blind School, Durtlang chuan nimin khan an sikul aṭanga kumina HSLC pass-te lawmpui­na hun an hmang a, minister of state Lal Thanzara'n a hmanpui.

Minister Lal Thanzara chuan, khaw hmu fiah lo chunga Special Blind School aṭanga HSLC exam zawng zawngte an pass chu lawmawm a tih thu sawiin, "School enkawltu board member-te leh zirtirtute thawhrimna rah a ni," a ti a; khawvel­ah khaw hmu fiah lo mi ropui tak tak an tam thu sawiin, Special Blind School-a zirlaite chu taima leh tumruh taka bei zel turin a fuih.

Special Blind School hi May 1, 2001-ah din niin, pawl 1-10 thleng a awm a, zirlai 30 an awm mek. HSLC exam hi vawi kua an hma­chhaw tawh a, vawi ruk chu 100% result an nei tawh a ni.