KHAWTHLIR
Police Officer kokhawm
Champhai SP RP Meena chuan nimin khan SP conference hall-ah additional SP, SDPO, deputy SP leh Champhai Police Station-a case I/O-te kokhawmin, an hnathawh dan a sawipui. RP Meena chuan, Champhai PS-a thubuai tam ber chu rûkrûk a ni tih sawiin, rûkrûk do tura ṭan la lehzual turin police-te chu a fuih a ni.
Ar notê sem
Animal Husbandry & Veterinary department chuan nimin khan Champhai leh Khawzawlah NLUP hnuaia ar vulh thlangtute hnenah ar notê an sem. Ar notê hi Champhaia chhungkaw 154 hnenah 50 ṭheuh leh Khawzawla chhungkaw 38 hnenah 50 ṭheuh an pe.
Inkhelh khap
Mizoram sorkar chuan New Secretariat Complex huam chhungah lirthei khalh zir leh inkhelh a khap. Hemi chungchangah hian GAD secretary Lalrinliana Fanai chuan May 19 khan thupek a chhuah a ni.
Nurse zir zo thlah
Nursing School, Lunglei chuan nimin khan Batch 17-nate pualin Graduation Ceremony an hmang a, nurse zir zo thar mi 15 hnenah lawmman an hlan. Nursing School-ah hian principal pakhat leh tutor pasarih hoin mi 30 an thawk mek. Mi 282 an zir chhuak tawh a; kum tin zirlai 20 lak phalsak an ni.
Buh chi sem
Agriculture department chuan nimin khan Serchhip Hmar Veng YMA Hall-ah kum 2013-2014 chhunga Serchhip district-a buh chin dan thar, Improved Package Practice an tih hmangtute leh buh hlawk zawka chin dan, System of Rice Intensification hmangtute hnenah ṭanpuina a sem. Vaimim chi ṭha (project vaimin chi) leh hlo túr an sem nghal bawk.
NPCDCS zirtir
National Programme For Prevention and Control of Cancer, Diabetes, Cardiovascular Disease and Stroke(NPCDCS) chuan nimin khan Lengpui damdawi-inah thawktute tan Non Communicable Diseases inzirtirna hun an hmang a; NPCDCS nodal officer Dr Eric Zomawia'n a zirtir.