MIMER ṭan hun hriat loh
Mizoram Institute of Medical Education & Research (MIMER) chu academic session thar aṭangin ṭan theih a nih dawn leh dawn loh a la chiang lo a, sorkar laipui phalna nghah mek a ni.
Vanglaini palai zawhna chhangin Health secretary Lalhmingthanga chuan, MIMER chu seat 100-a bul ṭan turin phalna dil mek a nih thu a sawi a, "Sorkar laipui hian engtikah nge an ngaihtuah dawn kan la hre lo. Mizoram sorkar chu tun session-a MIMER ṭan tur hian a inbuatsaih reng a, sorkar laipuiin phalna min pek hun azirin tun session-a ṭan hman a ni ang," a ti.
Lalhmingthanga sawi danin, MIMER chu seat 100-a ṭan tur ni mah se, hmunhma leh bungrua (infrastructure) neih ṭhat hrih loh vangin Mizoram sorkarin khum 50-a ṭan an dil a; mahse, sorkar laipui chuan Cabinet-in khum 100 tala din tura thutlukna a siam tawh avangin, khum 50-a din phalna chu Cabinet-ah dil turin Mizoram sorkar a hriattir. Mizoram sorkar chuan Union Cabinet-a dilna thlen ai chuan, khum 100-a bul ṭan a thlang zawk a, DPR a thehlut a ni.
Health department aṭanga thu dawn danin, sorkar laipui aṭangin MIMER din phalna hmuh a nih hunah pawisa pek chhuah a ni ang a, chumi hmang chuan a hmunhma siam a ni ang. A hmunhma peihfel a nih hnuah Medical Council of India (MCI)-in an endik ang a, ṭha tawka an ngaih chuan medical college chu kalpui theih a ni ang.
Vanglaini palai zawhna chhangin Health department hotute chuan, "Sorkar laipui aṭanga phalna kan hmuh pawisa pek chhuah a nih chuan a hmunhma chu kan peihfel har lo ang. Building awm sa vek a ni a, thil harsa tur a awm lo," an ti.
Medical college din tur hian a dinna tur damdawi-inah khum 300 aia tlem lo a awm tur a ni a, MIMER dinna tur State Referral Hospital, Falkawnah erawh chuan khum 300 dah a la ni lo.