MHIP-in General Assembly an hmang

Mizo Hmeichhe Insuihkhawm Pawl (MHIP) chuan nimin khan Vanapa Hall-ah General Assembly vawi 20-na an hmang a; sorkar department hrang hrangah thawktu Mizo hmeichhiate'n kar khatah vawi hnih tal puan bih hun siam ṭhin tura ngen an rel.

Nimina MHIP Assembly kaihruaitu, president Lalthlamuani chuan, MHIP-in kum 40 a tling ta chu lawmawm a tih thu sawiin, hruaitu hmasate leh sûlsutu hmasate chung­ah a lawm thu a sawi a; "Mizo hmeichhiate'n rahbi thar kan chuangkai a, The Mizo Marriage, Divorce & inheritance of Property Act, 2014 leh The Lushai Hills District (Village Council) Amendment Bill, 2014 sorkarin a pass hi Mizo hmeichhia zawng zawng tan a lawm­awm tak zet a ni," a ti.

Lalthlamuani chuan, Mizo hmeichhiate hamṭhatna tura sorkarin dan thar a siamte chu hmei­chhiate'n an hriat chian zawk theih nan ram pum huapa zirtirna kalpui tum a nih thu a sawi a; village council leh local council member atana hmei­chhia 694 thlan tharte chu duhsakna a hlan a ni.

MHIP Assembly-ah hian Mizoram State Commission for Women chairperson Vanlalawmpuii Chawngthu, MLA leh Sairang branch YMA president Teressa Rothangpuii hnenah chawimawina an hlan a; kumin VC leh LC in­thlana tling hmeichhia 694 hnenah lawmpuina thuziak an hlan bawk.

Assembly hi vawiinah chhunzawmin, kum 2015-2017 chhunga hruai­tu turte an thlang ang.

MHIP general secretary Saipuii'n report a pek danin, MHIP hian sub-headquarters pasarih, block 19, joint MHIP 19 leh branch 729 a awm mek a, member mi 2,50,000 vel an ni. Kum 2013-15 chhunga MHIP general headquarters sum hmuh zat chu Rs. 77,47,055 a ni a, Rs. 68,11,320 an hmang. Kum 2015-17 chhunga budget atan Rs. 44,65,000 pharh a ni.