MGNREGA sum pek chhuah tlai vangin Sorkarin cheng nuai 1336.94 a chawi

Mizoram sorkara Finance department chuan MGNREGA hnuaia inhlawhna sum táng cheng nuai 1,200 chu tun hnai khan a pe chhuak. Hetih lai hian, MGNREGA hnuaia pawisa hmuhte pek chhuah tlai avangin Mizoram sorkar chuan kum 2014-15 chhung khan Rs. 13,36,94,000 a chawi.

Thu dawn danin, Mizoram sorkar chuan kum 2014-15 chhungin Ministry of Rural development aṭangin MGNREGA hnuaiah ṭum li pawisa a hmu a, pawisa hmuh belhkhawm chu Rs. 1,11,41,23,000 a ni. Sum hmuhte chu Finance department-in a pe chhuak nghal vek thei lo a, May 13, 2015 khan cheng nuai 1200 a pe chhuak leh a ni.

MGNREGA sum hi Finance department-in hun tiam chhungin nodal department, Rural Development hnenah a pek chhuah loh avangin 2014-15 chhungin Rs. 13,36,94,000 a chawi tawh. Hun tiam chhunga pawisa pek chhuah lohah hian Central-in sum a rawn pek apiangin 12% zel Mizoram sorkarin a chawi a ni.

Central-in sum a rawn pek hmasak ber chu May 21, 2014-ah niin, nuai 1,176 a rawn pe a; Finance department chuan August 21, 2014-ah a pe chhuak a, a hun taka a pek hman loh vangin cheng nuai 141.12 a chawi a ni.

Central chuan a vawi hnihna atan August 19, 2014-ah nuai 5,532.13 a rawn pe leh a; Finance department chuan ṭum hnih pek chhuahah hmangin, October 7, 2014 leh December 12, 2014-ah a pe chhuak. Pek chhuah tlai vang hian sorkar chuan cheng nuai 663.85 a chawi a ni.

A vawi thumna atan Central-in November 3, 2014-ah cheng nuai 3,233.10 a rawn pe leh a; Finance department-in January 17, 2015-ah a pek chhuah avangin cheng nuai 387.97 a chawi leh. A hnuhnung ber atana Central-in cheng nuai 1,200 a rawn pek chu Mizoram sorkarin March 5, 2015-ah a dawng a, Finance-in May 13, 2015-ah a pe chhuak a; a hun taka pek chhuah loh vang hian Mizoram sorkarin cheng nuai 144 a chawi leh a ni.

Central-in a rawn pek hnu­hnun ber, cheng nuai 1,200 chu sorkar kum hlui 2014-15 ah Finance department-in a pek chhuah hman loh avangin Central-in kum 2015-16 atana opening balance-ah a hman loh nan RD department chuan hmang tawh angin MIS report-ah a ziak a ni.

Finance department-in May 13, 2015-cheng nuai 1,200 a pek chhuah hi RD Secretariat-a a kal hnuah RD director-ah a kal ang a, RD director-in Treasury-a a tihfel hnuah pawisa chu State Employment Guarantee Fund-ah dah luh a ni ang. Chumi hnuah district pariata DRDA project director-te hnenah a kal ang a; job card neite'n hna an thawh hlawh atan an account ṭheuhah BDO-te'n an thun dawn a ni.

Thudawn danin, sum pek chhuah tlai vanga Mizoram sor­kar sum chawi tur chu implementing agency (RD department)-in an ṭhíng ngai lo a; an ṭhìn ngai loh chhan chu sorkar sum harsat laia lo dil chhên chu fuh loa an ngaih vang a ni.