Lungleia zirlai tithate chawimawi

MZP headquarters, Lunglei chuan nimin khan Saikuti Hall-ah Lunglei district aṭanga kumin HSLC leh HSSLC-a top 10-a langte leh distinction-a pass-te chawimawi hun an hmang a, Lunglei HPC vice chairman S Laldingliana'n a hmanpui.

S Laldingliana chuan, zirlai leh zirtirtute ṭhahnem­ngaihna chuan hun lo kal zelah pawh rah duhawm chhuah zel se a duh thu sawiin, zirlaite chu kohhran leh khawtlangah a tâwk chauha inhmang turin a chah a; thil dang zawng zawng aia an zirna chiah dah pawimawh thiam turin a fuih.

S Laldingliana chuan, Mizote'n chîn dan ṭha kan chin chhoh zel chu chawimawi tlakte chawimawi a ni tih sawiin, "Hei hian Mizo khawtlang leh mimal ngaihdan leh sûkthlêk pawh thui takin a siamṭhat ngei ka beisei," a ti.

HSLC 2015-ah khan Lungleia Baptist Higher Secondary School aṭangin top 10-ah mi pahnih an lang a; pakhatna Jennifer Vanrammawii chu thuchei, pawisa leh Lunglei East bialtu MLA PC Lalthanliana pek laptop hlan a; pathumna C Lalnunfeli chu thuchei leh pawisa pek a ni.