Total Literacy Drive hawng

Nimin khan Phairuangkai Middle School-ah ‘Total Literacy Drive 2015 in Lunglei District’ hawn a ni a; Education department Adult Education Wing-a animator te, NGO hruaitute leh zirlai te, puitling ziak leh chhiar la thiam lote an tel.

Lunglei DEO HS Zosangliana chuan, Mizoramin puitling ziak leh chhiar thiam lote thiamtirna kawngah nasa takin hma a sawn tih a sawi a, "Ziak leh chhiar thiam hi kum 2001 Census-ah 88.49% a ni a, 2011-ah chuan 91.33%-ah a kai chho a ni. Mahse, state dangte pawh­in nasa taka ṭan an lak ve zel avangin tunah hian Mizoram chu India ramah pathumna a ni a, ṭan lak a ṭul hle a ni," a ti.

Total Literacy Drive 2015 hi ziak leh chhiar thiam lote'n an thiam theihna atana hmalakna a ni a, district pathum - Mamit, Lunglei leh Lawngtlai district-ahte kalpui mek a ni.