MR Bill zir chiang tur din a ni Inrenchemna kan kalpui dawn chauh: Lalsawta

Finance minister Lalsawta chuan, sorkar hnathawkte medical reimbursement (MR) bill zir chiang tur committee din a nih thu a sawi a; sorkarin inrenchemna kawngah hma a la dawn chauh tih sawiin, "Tuna kan kalpui chin hi chu a bul ṭanna tur chauh a ni," a ti.

Vanglaini palaiin a kawmnaah Lalsawta chuan, vawi leh khata inhrêk vakin sorkar hna kal mek a tikhawlo thei tih sawiin, "Inrenchemna lam hi kan ti dawn chauh. Tuna inrenchemna kan kalpui chin hi kan duhthusam a la ni bik lo. Kan pawisa neih tam lo mah se, kan neih chhun ang ang hi ṭangkai taka hman a nih theihna atan theih­tawp chhuah zel a ni," a ti.

Finance Minister chuan, sorkar hna­thawkte MR bill a tlem theih deuh dan tur sorkarin a ngaihtuah tih sawiin, "Damlote'n an tawrh phah chuang si loa siam ṭhat dan ngaihtuah tur committee din a ni," a ti a; MR bill kalphung siamṭhat ni mah se, pawisa renchem vanga damlote'n an tawrh chu sorkarin a duh chuang lo tih a sawi.

Sorkar hnathawk lak kawngah sorkar a inhrêk nasa hle nia sawiin Lalsawta chuan, "A ṭul tàwpah lo chuan sorkar hnathawk kan la thar lo a, mamawh tàwpa kan lak pawh vacancy awm ang kan hnawhkhat thei lo. Thla tin hlawh pek ngai lak belh vak hi sorkar sum dinhmunin a zo lo. Sorkar hnathawk lak belh hi kan châk ve viau ṭhin a, mahse kan tlin hrih lo a ni," a ti.

Finance Minister sawi danin, Printing & Stationery department chu bungraw hrang hrang nei duah loa department-in a mamawh tur ang chi nei tam tura tih an ni a; sorkar department-te'n Printing & Stationery hi an dàwr nasat chuan bungraw man a tlawm dawn a, chu chuan sum luangral tur eng emaw zat a veng thei tura ngaih a ni.

Office inenkawlna senso titlem tura theihtawp chhuah a nih thu sawiin, Lalsawta chuan, "Office lam pawh an inren sâwt hlein kan hria. Department ṭhekhatah chuan office expenditure tur min dil belh ṭhin a, mahse tumah kan la pek belh lo," a ti.

Minister Lalsawta chuan, Mizoram aṭanga thawn chhuah tam ber chu pawisa a ni tih sawiin, "Mizoram sum leh pai tam tak ram danga luang chhuak ṭhin hi a reh theihna atan sorkarin theihtawp chhuah a tum a ni," a ti a; department-te chu an ngaih pawimawh zawng ringawt buaipui lo a, policy mumal duang chunga kaltir tum an nih thu a sawi bawk.

Inrenchemna tura sorkar Ṭan lakna

Minister, parliamentary secretary, MLA leh official-te'n awmpui an neih ṭhin tihtlem a ni.

Ṭul bikah lo chuan official-te zin chhuah phal a ni lo a, Mizoram House-a thawktute hmang ṭangkai tura tih an ni.

Minister, parliamentary secretary, MLA leh official-te'n petrol/diesel an dawn ṭhin tihtlem a ni.

Governor, Chief Minister leh Speaker bak thlawhtheihnaah executive class-a chuan phal a ni lo.

Office expenditure tihtlem a nih theihna atan theihtawp chhuah a ni.