Eiruka inhnamhnawih man chhuah Sorkarin a dîm ngai lo: Lal Thanzara

Minister of State Lal Thanzara chuan, Congress sorkarin engineer emaw, sorkar hnathawk dang tu pawh eirûkna thila thiam loh changte chu dîm miah loin suspend an nih hnuah a hrem zui ṭhin niin a sawi.

Mizoram Engineering Service Association (MESA)-in nimina Tourist Lodge-a conference an neih a hmanpuinaah thu sawiin, Lal Thanzara chuan, "Sorkar hnathawk an eiru ngei tih finfiahte chu kan dim ngai lo. Chutihlaiin hna thawk ṭha, eirûkna thil­a inhnamhnawih anga dik lo taka mawhpuhte chu sorkar pawhin a hnathawk an nih angin an thlavang hauhsak zel a tum. Hre chiang si lo, zawt chiang duh lo leh finfiahna nei loa thu theh­darh chíngte hi hnam anga kan rilru put hmang fuh lo siam ṭhat ngai a ni," a ti.

Lal Thanzara sawi danin, Congress sor­karin corruption-a inhnam­hnawihte a ṭanpui ngai lo a, a hrem zawk ṭhin. Ṭhahnemngai taka thawk îtsîkna vanga eirûkna thila mawhpuhte chu finfiah an nih hma chuan sorkarin a hrem ngawt thei lo a ni.

Sorkarin mipui tana ṭha ber duhsakin, mithiam­te ráwn hmasa a, zirchian a nih hnuah thutlukna a siam ṭhin tih sawiin Lal Thanzara chuan, "Sorkar­in thil thar a kalpuite hi a ṭha lo a nih chuan a titawp leh mai dawn a ni," a ti a; thâwk-a-phita sorkar thil tih hrim hrim nasa taka dodal chiam ṭhin chu lungchhiatthlak a tih thu a sawi.

Lal Thanzara chuan, engineer-te chu hmasawnna ruhrel satu leh remkhawmtute an ni a, an inpekna hniam leh san dan azirin ram hmasawnna a chakin a chak lo ṭhin tih a sawi a; engineer-te chu an project reng reng hunbi tiam chhunga zawh hman a nih theih nan bul ṭan hma ṭhin tur leh awmze nei loa tei khawmuang lo turin a chah.

MESA conference hi an president Vanlal Tlana'n a kaihruai a, member thar lawm luhna leh pension thlahna hun an hmang.

MESA hi engineering department hrang hrang leh department ṭhenkhat engineer chhawrnaa engineer-te intêlkhawm an ni a, member 376 an awm mek a ni.