June 16-ah Property Tax la tan dawn

Aizawl Municipal Council (AMC) chuan June 16, 2015 aṭangin Aizawl khawpui huam chhunga in leh in hmunte aṭangin Property Tax a la ṭan dawn.

AMC hotute chuan, Property Tax chu khawpui dangte kal dan en chung leh mipui phurrit lo thei ang ber tura lâk a nih tur thu an sawi.

AMC hotute hian nimin khan Aizawl Press Club-ah thuthar theh­darhtute Property Tax nih phung leh lak dan turte an hrilhfiah a; AMC executive councillor (Revenue) Hmingthanzami chuan, Property Tax chu state sorkarin la tura a tih angin AMC-in a la dawn tih a sawi a, "Property Tax hi in neitute pek tur a ni a, in nei lo tan pek a ngai lo. In nei ṭha leh mi hausa apiangin an pe tam dawn a ni," a ti.

Hmingthanzami sawi danin, Property Tax hi kumin kum 2015-16 atan June 16-ah lak ṭan a ni dawn a, AMC office-ah kumtluana pek theih a ni ang. Kuminah chuan bul ṭan kum a nih avangin AMC Ward indawtin an vengah an khawn ang a, kum dangah chuan a hranpaa khawn loin, AMC office-ah kum tluanin pek theih a ni ang.

Property Tax hi kum khatah ṭum li pekah hman theih a ni dawn a, pek hun chhung (financial year tawp hun March 31)-a pek hman loh chuan late fee nen pek a ngai dawn.

Hmingthanzami chuan, Property Tax chu Land Revenue & Settlement department-in tuna leiman a lak aiin hmun ṭhenkhatah chuan a tlem zawk dawna an chhût thu a sawi bawk.

AMC executive councillor dang, Lalzirliana chuan, Property Tax tlingkhawmte chu Aizawl khawpui hmasawnna atana hman tur a nih thu sawiin, "Aizawl tihhmasawnna atan, mipui tan vêka hman tur a ni a, langtlang taka thil tih a ni ang," a ti.

Lalzirliana chuan, Property Tax chu chhiah thar hlak ni loin, Land Revenue & Settlement department-in leiman leh Building Tax an lak ṭhin thlakna a nih thu a sawi a, "AMC-in a la tawh dawn a, a hming a danglam mai chauh a ni," a ti bawk.

Sensitization programme-ah hian AMC superintendent Lalruatliana'n Property Tax lak dan tur te, a lak zat tur te, in leh ram hlutna chhût dante a sawifiah a, "Property Tax pek zat tur hi mahniin inchhût vek theih a ni a, he chhiah aṭang hian kum khatah cheng vbc. 5 aṭanga 10 vel hmuh beisei a ni," a ti.

Lalruatliana sawi danin, Aizawl khawpui huam chhunga veng tin chu category pariatah ṭhen niin, category tin chu an hlutna a inang lo a; in bik chu a kum zat te, a dinna hmun te, a sakna hmanrua te, a len zawng leh sàn zawngte hmangin chhiah pek zat tur chhût a ni.