Aizawla college pahnihah morning college Lungleiah private college thar din a ni dawn

Mizoram sorkar hnuaia college hrang hrangah kum 2015-16 academic session atan general course (arts, science, commerce) first semester-ah seat 5,960 vel awm tura ngaih a ni a; chutih laiin, HSSLC 2015 exam-ah zirlai 7,583 an pass. Academic session thar aṭang hian Aizawlah morning college leh Lungleiah private college thar pakhat din tum a ni.

Vanglaini palai zawhna chhanga H&TE department hotute'n an sawi danin, college hrang hrangah academic session thara under graduate course first semester-a seat an neih zat tur an zawt vek a; college hrang hrangte chuan H&TE directorate-ah an hriattir tawh hlawm. General college zingah Kamalanagar College chiahin an la hriattir lo a ni.

Aizawl khawpui chhung bikah chuan general college pakua a awm a, chungah chuan seat 3,360 vel awm tura ngaih a ni a; Aizawl khawpui pawnah chuan first semester-ah seat 2,590 vel awm tura ngaih a ni.

Aizawl khawpuia college pakua zingah, sorkar college pariatte chuan seat 2,460 vel an nei dawn a; Mizoram sorkar hnuaia awm ve lo Pachhung University College-in seat 900 vel a neihte nen a vaiin Aizawlah seat 3,360 vel awm tura ngaih a ni. PUC-ah hian Arts-ah seat 540 vel, Science-ah seat 300 vel leh Commerce-ah seat 60 a awm ang.

Lunglei khawpui bikah chuan tuna college ding lai pahnih - Lunglei College leh JB College-ah seat 472 an nei dawn. Lunglei College bik hian seat 322 an nei dawn a, chung zinga seat 72 chu Science subject atan a ni ang.

Hetih lai hian, Vanglaini palai zawhna chhangin, H&TE joint director H Lalramhluna chuan Lungleiah hian private college thar, Kapthangi College din tum a ni a, sorkar pawhin a pawmpui tawh a, academic session tharah ṭan hman beisei a nih thu a sawi. College thar din tumah seat eng zat nge awm thei dawn tih hriat a la ni lo.

Hetih lai hian, general course ni lo, degree course tho si, pawl 12 pass hnua professional course chi hrang hrang zir theihna - Women Polytechnic, Aizawl leh Mizoram Polytechnic, Lungleiahte a awm a; Mizoram College of Nursing bakah General Nursing & Midwifery (GNM) zirna a awm nual a; RIPANS-ah course a awm nual bakah, Lungleiah BCM enkawl HATIM a awm bawk.

Mizorama general college ni lo, college/institution dangah pawl 12 pass chhuak ṭhahnem tak chu an lut turah ngaih a ni a; Mizoram páwna college hrang hrangah ṭhahnem tak an chhuak tura ngaih a ni bawk. General college bika seat awm zat leh kumin HSSLC-a pass zat inthlauhna chu 1,623 a ni.

H&TE hotute chuan, Mizorama general college-a seat 5,960 vel bakah, Mizoram chhunga professional course zir turte leh Mizoram páwna zir turte nen, Mizoram college-a seat awm zat hian kumina pawl 12 pass thar zirlai 7,583-te chu a tuam kim thei tura an ngaih thu an sawi.

H&TE Joint Director chuan, Aizawl khawpuia college hrang hranga zirlaite'n seat an inchan loh ṭhin phuhrûkna turin Govt. Aizawl College leh Hrangbana College-ah academic session thar aṭangin morning college din tum a nih thu leh, buaipui mek a nih thu a sawi.

H&TE hotute sawi danin, morning college-ah hian fee lak a ni dawn a, fee tling khawm chu sorkar/department-ah thehlut loin, college inenkawl nan leh thawktute lawmman atan hman a ni ang.