Lungtian model village nihna hawng

Lawngtlai East bialtu MLA, H Zothangliana, parliamentary secretary-in a bial chhunga model village atana a thlan Lungtian khuaah nimin model village atana thlan hawnna inkhawm hman a ni a; H Zothangliana bakah minister C Ngunlianchunga'n a hmanpui.

Bialtu MLA H Zothangliana chuan, Lungtian khua model village atana a thlan chhan sawiin, "Lungtian khua hi theihna tam tak awmna, hmasawn tura mipuite inlungrualna khua a ni," a ti a; khaw mipuite chu theihtawpa hmasawnna kawnga ṭang­rual turin a chah.

Minister C Ngunlianchunga pawhin thu sawiin, model village nihna chuan mawhphurna tam tak a keng tel tih hriat a pawi­mawh tih a sawi a, "Thiang­hlimna, sorkar thawh­puina, eizawnna leh thil dang dang­ah mi tinin tih tur kan nei ṭheuh a ni tih kan hriat a pawimawh," a ti.

Lungtian khua hi Phawngpui tlang panga awm niin, chhungkaw 330 vel chhenna khua a ni a, mihring 1,800 vel awmin, village council pahnih an nei a ni.