DC kawng laih mek enfiah

Kolasib DC Jitender Yadav chuan Sairang leh Bairabi inkar rel kawng siam meka rêl chawlhhmun (station) panna kawng laih mek chu nimin khan a tlawh a; kawng laih sa tihdanglam a ṭul dan enfiahin, ram neitu Kawnpui V/C-I te nen inremna an siam.

Rel chawlhhmun panna kawng laih chu ram neitute nena inremna ang lo deuha tih a nih thu Kawnpui VC-I hruaitute'n an sawi avangin Kolasib DC hian kawng laih hna thawh chu a enfiah a ni.

North East Frontier Railways engineer Amit Jaiswal chuan kawng hlui ringa rel station pawhtir tur chuan kawng ko a sân dawn avangin, kawng dang an zawng tih a sawi a, ram neitute nena inremna an siam tawh anga link road siam ṭhat hna chu thawhsak a intiam a ni.

Jitender Yadav chuan, NEF Railways hotute chu hma thar an lakna tur reng rengah ram neitu V/C-te hrilh hmasa zel turin a chah.