ZNP-in sorkar leh BD Chakma an dem

ZNP chuan thuchhuah siamin, minister of state Dr BD Chakma chuan a enkawl department sum hmangin a private secretary mimal hman tur Gypsy hardtop second-hand a leisak niin an tarlang a; hei hi an dem thu an sawi.

ZNP chuan, minister BD Chakma motor lei dan hian chief minister Lal Thanhawla sum renchem a tum tak tak lohzia a tichiang niin an sawi a, "Dr BD Chakma-in department sum hmangin a PS mimal hman tur Gypsy a leisak hre reng chungin a ngaizam thei a, action a la ngam lo. Hei hian CM ni tlak a nih lohzia a pholang chiang a, mipui sum enkawl zel tura rintlak a nih tawh lohzia a tilang chiang hle," an ti.

ZNP chuan sorkar chu sum harsatna lian tak a tawh vanga chhiah chi hrang hrang nasa taka a tihpun bakah, mipui phurrit a siam belh mek zel niin a sawi a; sorkar chu sum leh pai renchemna tur ruahmanna 'Fiscal Policy' mumal nei loah puhin, an hmalakna awmte chu a hming chauha mipui bum tumna niin an tarlang.

ZNP tarlan danin, Transport department-a MVI (Enforcement Cell)-in tunlai hian Lunglei leh a chhehvela lirtheite'n pollution clearance certificate an neih leh neih loh an enfiah a, a nei lote chu Rs. 1,000 an chawitir zel a, MVI-in clearance a lo pek theihte chu Rs. 150 zel an chawitir bawk.

ZNP chuan, Lungleiah motor pollution test-na tur khawl leh hmunhma a la awm lo hrim hrim nia sawiin, "Mipui phurrit siam belhchhah tura sorkarin ruahman lâwkna nei si loa sum leh pai tuakna tur dapa chhiah a khawn belh zel hi kan dem tak zet a ni," an ti.