Mipuiin ZPM sorkar an hre chiang ta hle - Zoramthanga

MNF president Zoram-thanga chuan, Mizoram mipuiin tunah chuan ZPM sorkar an hre chiang chho ta hle niin a sawi a; sorkar laipuia Congress an sorkar laiin Mizorama MNF sorkar chu duh tawkin an sawisa ṭhin niin a sawi bawk.

Zoramthanga hian November 16, Inrinnia Aizawl East MNF Block extended meeting-ah thu sawiin, "Tunah chuan mipuite'n ZPM ministry an hre chiang chho ta hle. Airport hralhna an zawng, ZMC hralh an tum leh bawk, thil dangte pawh thâwm a awm chho zel; an mangang ve hle tih a hriat," a ti.

MNF President chuan sorkarin sum a enkawl dan sawiin, "SASCI hna leh sum awm sa pawh ZPM sorkarin an ipteah an ak tawp ringawt mai a ni ber, sanction a nihna ang pawha hmang loin, SEDP vbc 150 leh SASCI vbc 230-te kha min pek chhan ni lo, sorkar hnathawk hlawhah an pe ringawt mai a ni," a ti a; guideline anga hman loh vanga state suma rulhtir a nih chuan Mizoramin sum lama a hmachhawn tur chu a namai dawn lo hle niin a sawi.

Zoramthanga chuan, MNF rammute chu kum 1986-ah an lo chhuak a, unit pawh an la nei ngai lo chungin MLA inthlan hmasa berah seat 40 zinga 24 an la tih a sawi a, "Central-ah Congress an sorkar lai khan an duh tâwkin min sawisa ṭhin... Pathianin hun a tihah chuan min khai chhuak leh ṭhin," a ti.