Manipur-a Mizote leh Mizorama Manipur mite himna turin Mizoram sorkarin hmalak zel tum

Home department chuan thuchhuah siamin, Manipur-a Mizo awmte leh Mizorama Manipur mi awmte himna turin Mizoram sorkarin hma a lak chhunzawm zel dawn thu a tarlang.

Manipur tualchhung buaina kal zelah tun hnaia buaina chhuak vanga hliam leh thi eng emaw zat an awm chu Mizoram sorkarin pawi a tih thu tarlangin Home department chuan, "Tun hnaia buaina avanga hliam tuar leh nunna chante leh an chhungte zawng zawng Mizoram sorkar chuan a tuarpui tak zet a ni," a ti.

Home department chuan, Manipur tual­chhung buainain kum khat leh thla ruk zet a awh tawh a, mipuiin nasa takin an tuar tih tarlangin, "Buaina avang hian Manipur aṭangin sahimna zawngin Mizoram chhungah mi eng emaw zat an rawn lut," a ti a; sahimna zawnga rawn lutte chu Mizoram sorkar leh mipuiin theihtawp chhuahin chhawmdawl hna an thawh thu a tarlang.

Buaina avanga Zo hnahthlakte chhawm­dawlna lo pe ṭhintute chungah Mizoram sorkar a lawm tak meuh tih tarlangin Home chuan, "Buaina a tàwp theih nan central sorkar leh Manipur sorkarte theihtawp chhuaha hma la chhunzawm turin Mizoram sorkar chuan a ngen," a ti.

Home department chuan, tun hnaia Manipur buaina kaihhnawihah Mizorama hnam leh hnam inhmelmâkna tichhuak thei zawnga hma la lo turin mi tin an ngen a; "Mizoram chhunga hnam dang, a bik takin Manipur state-a mite himna turin Mizoram sorkar chuan hma a la zel dawn," a ti. Mizoram páwna cheng Mizo, a bik takin Manipur-a zirlaite leh hna thawka awmte himna turin Mizoram sorkarin hma a la chhunzawm zel dawn tih a tarlang bawk.