KHAWTHLIR

Thisen pe

November 16, Inrinni khan KṬP, Electric Veng Bial-in Civil Hospital, Aizawl tan thisen unit 42 an pe a, petute mipa 35 leh hmeichhia pasarih an ni; Civil Hospital blood bank-ah mi 52-in an pe bawk. KṬP, Damveng Branch-in an din champha pualin Synod Hospital tan thisen unit 35 an pe a, petute mipa 32 leh hmeichhia pathum an ni. PYD, Lunglei Pukpui Bialin Lunglei Civil Hospital tan unit 29 an pe bawk a, petute mipa 23 leh hmeichhia paruk an ni.

MLA-in pe

Lunglei South bialtu MLA Lalramliana Papuia chuan November 15, Zirtawpni tlai khan a chenna inah a bial chhung thingtlang khuaa sorkar sikul pali hnenah computer leh printer a pe. Lunglei South bialtu MLA-in computer leh printer a pekte chu - Ṭhaizawl Primary School, Bualte Middle School, Ṭawipui South Higher Secondary School leh Mualṭhuam South Primary School-te a ni.

MLA-in hmanpui

November 15, Zirtawpni khan Mizo Hmeichhe Insuihkhawm Pawl (MHIP) Venghlun Branch, Lunglei chuan Venghlun Indoor Stadium-ah an din champha phak vawi 50-na (golden jubilee) an lawm a, bialtu MLA T Lalhlimpuia'n a hmanpui. MLA chuan, nuin in chhungkhur a enkawl danin fate dinhmun thlengin a hril a ni tih hre thar leh turin MHIP member-te chu a chah. MHIP, Lunglei Venghlun Branch-ah hian member 822 an awm mek a ni.

Jubilee lawm

Mizoram Upa Pawl (MUP), Armed Veng Unit chuan November 16, Inrinni khan an din champha kum 50-na (golden jubilee) an veng community centre-ah an lawm a; bialtu MLA B Lalchhanzova, minister of state leh bialtu corporator Christina Roluahpuii Sailo ten an hmanpui. B Lalchhanzova chuan, upate chu khawtlang tiropuitu an nih thu sawiin, "Chawimawi in phu em em. Kum 80 chung lam mi 60 dáwn in awm hi a lawmawm hle a ni," a ti.