Zirnaa thleng sang lote tan pawh thawh tur leh tih tur dang a tam - CM

Chief minister Lalduhoma chuan November 16, Inrinni khan lehkha a lo zir tawhna Gandhi Memorial High School (GM H/S), Champhai kum 75-na (platinum jubilee) lawmna a hmanpui a; zirnaah hlawhtlin vek theih a ni lo a, zirnaa thleng sang lo tan pawh thawh tur leh tih tur dang a tam thu a sawi.

Chief Minister chuan, zirnaah mi zawng zawng hlawhtlin vek theih a ni lo tih sawiin, "Zirnaah harsatna kan tâwk a nih pawhin kan beidawng mai tur a ni lo. Pathian min pek theihna hlu tak tak dang kan nei thei. Zirnaa thleng sang lem lo mi hlawhtling tak tak khawvelah an tam a, tih tur leh thawh tur dang a tam lutuk. Chutiang mi, theihna leh thiamna kawng dang nei site tan Handholding hian remchang a siamsak dawn," a ti.

Zirnaa hlawhtling turin sikul luh tirh phat aṭangin mar ṭha tak, hahthlak lutuk si loa zir nghal a ṭhat thu sawiin Lalduhoma chuan, "Exam dawna beih vak ngai loin ṭha takin a pass theih. Ni tin tlem tlema chaw kan ei reng avangin kan ṭhang lian ṭhin a, thâwk leh khata chaw ei nghek chu thihpui a hlauhawm zawk," a ti a; mi hlawhtling dang tam tak chher chhuak zel turin GM H/S-a thawkte duhsakna a hlan.

CM Lalduhoma chuan, hlim taka sikul a kai ṭhinna GM H/S hmunhmain thil tam tak a hriat chhuahtir thu sawiin, "Ka lung a tileng hle. Kum 1965-ah he sikulah hian pawl 8 ka zir a, 1966-ah ram a lo buai a, rammu turin ka chawlhsan leh rih. Taksa lam harsatna avanga ka chhuah hnuah kum 1970 khan pawl 10 zir turin ka lut leh a, ṭha takin ka pass a ni," a ti.

Chief Minister chuan, GM H/S-a a kal laiin Mizo Union block ṭhalai hruaitu a nih thu sawiin, "Mathematics ka thiam avangin headmaster Pu Thanseia khan ni tin Rs 10 hlawhin mathematics zirtirtuah min chhawr ṭhin. Mizoram union territory inthlan hmasa ber 1972-a Mizo Union an sorkar khan chief minister Pu Ch Chhunga khan min la thla ta a ni," a ti a; GM H/S chu tun dinhmun a thlen theihna tura chhertu, thil tam tak a zir chhuahna a nih avangin a theihnghilh tawh dawn loh thu a sawi.

CM Lalduhoma hian platinum jubilee hriatrengna lungphun a hawng a, Mizorama museum hmasa ber GM H/S Museum, kum 1968-a din a tlawh bakah, zirlaite nen an inkâwm. Jubilee lawmna pui ber chu November 21-22, 2024 chhungin neih a ni dawn a, he sikula zir tawh dang Home minister K Sapdanga'n a hmanpui ang.

GM H/S platinum jubilee lawmna hi headmaster HT Vanlalsawma'n a kaihruai a; zirlai 232, zirtirtu 14 leh non-teaching staff pakhat an awm mek a ni.