Kawlphetha hman man chungchangah Mizoram sorkarin NEEPCO khin lêt a tum

18th November, 2024

Power & Electricity minister F Rodingliana hoa a ina November 16, Inrinnia Finance leh Law & Judicial department hotute ṭhukhawm chuan, kawlphetha lei leh hralh chungchanga thubuai leh hlabuai ngaihtuahtu Central Electricity Regulatory Commission (CERC)-ah NEEPCO Ltd. khin lêt an rel.

NEEPCO-in Tuirial Hydel Project-a kawlphetha hmanna man (bill) thla tin pangngai ni lo, supplementary bill, shortfall energy bill cheng vbc. 102 Mizoram sorkar a ṭhìn chungchangah Mizoram sorkarin a khin let dan tur Power Minister hoin an rel a ni.

Sorkar thuchhuah tarlan danin, shortfall energy bill hi dan hnuaia ennawn leh turin Chief Minister leh Power Minister-te'n lehkha bakah, hmaichhanah sorkar laipuia Power Minister an sawipui tawh. Chumi chungchang liau liau sawi turin Ministry of Power chuan a kaihhnawih (stakeholder) hrang hrangte September 24, 2024 khan Delhi-ah a ko a ni.

Chuti chung chuan NEEPCO aṭanga dawn kawlphetha leina bá tihlanna PRAAPTI portal-ah shortfall bill a la chuan reng avangin Inrinnia Power Minister hoa ṭhutkhawmah hian ngaihtuah a ni. CERC hnena zualko turin thutlukna siam a ni a, chumi atana thil ṭulte chak taka buaipui nghal a ni. Harsatna hi CERC hnena thlen a nih chuan, a vaia a ngaihhnathiam loh pawhin, nasa takin a tihtlakhniam beisei a ni.

Shortfall bill hi khin lêt a nih loh a, November 2024 chhung ngeia pek tlak a nih loh chuan CERC lamin Mizoram a thunun/regulate dawn. CERC-in a regulate chuan Mizoram sorkarin power a hralh chhawn (power trading) khap a ni ang a, thil dang tam takah khuahkhirh a ni bawk ang.

Bill hi NEEPCO hian kum April 2019 - March, 2024 chhunga Tuirial HEP-in kawlphetha a siam chhuah tur zat ruahman sa a siam chhuah theih loh avanga Mizoram sorkar hnena sum a dil (a rawn bill) a ni.

CERC regulation-a a inziah danin, kum khat chhung bill chu a kum lehah zel chauh an bill tur a nih laiin, NEEPCO hian kum 5 chhung bill a siam hi CERC Regulation bawhchhiatna nia hriain Mizoram sorkar chuan a khing let dawn a ni.