Mizorama Meitei-te fimkhur turin chah

MZP chuan, Manipur tualchhung buaina avangin Mizorama Meitei awmte fimkhur turin an chah a, Meitei-te himna ngaihtuah turin Mizoram sorkar an ngen bawk.

MZP hruaitute chu November 16, Inrinni khan an pisaah ṭhukhawmin, tun hnaia Jiribam district-a CRPF-in Zo hnahthlak mi 10 an kah hlum chungchang an ngaihtuah. Thuchhuah siamin, "Mizoram mipui lungawi lo leh thinrimna inmung mek ngaihtuahin, Meitei tan tute emaw insûm zo lo kut tawrh mai theihna a awmin kan hria a, Meitei-te sahimna ngaihtuah turin Mizoram sorkar kan ngen a, Mizorama Meitei awmte pawh fimkhur turin kan chah a ni," an ti.

Manipur khawpui Imphal-a Mizoram aṭanga lehkha zira awmte’n Meitei kut an tawrh loh nan hma la turin MZP chuan India sorkar an phût a, "Manipur sorkar kan ring lo a, Mizoram aṭanga zirlaite himna chungchangah, Manipur ni lo, India sorkar hmalakna kan beiseiin kan phût tlat a ni," an ti a; Mizoram aṭanga Imphal-a zirlai awmte himna tura hmalak a nih loh a, tuar an awm chuan an ngaih thutak tur thu an tarlang.

MZP chuan, Manipur-a Zo hnahthlakte buainaah Mizoram a rálbáng thei lo nia sawiin, "Manipur-a Zo fate tawrhna hi kan ngaihven reng a, an nat angin kan na reng a ni," an ti. Manipur sorkarin Meitei firfiakte a khuahkhirh theih hma chu an state-a science leh technical zirna-ina Mizoram seat-te chu zirna-in dangah behtir rih turin India sorkar an ngen tih an sawi bawk.