MNF kum 2 an sorkar hmain ZPM thlipui a tleh - Duhoma
ZPM Legislature Party (ZLP) leader Lalduhoma chuan, MNF sorkar kum hnih a tlin hmain Zoram Peoples' Movement (ZPM) thli a tleh niin a sawi a, "Thingtlang kilkhâwrte pawh a nuai," a ti.
ZPM-in party-a mi thar lawm luhna inkhawm, nimina ZPM pisaa buatsaihah thu sawiin Lalduhoma chuan, "Mizoramah sorkar thar a pian aṭanga kum thum chhung vel chu boruak a awm vak ngai lo. Tunah chuan MNF sorkar kum hnih pawh a tlin hmain ZPM thli a tleh a, kan lawm luh zingah MNF-te pawh an tel ṭhin," a ti a, ZPM thli tleh dan chu mak an tih zawk thu a sawi.
ZPM thli tleh chu dan kîr theih lohin a tleh mek nia sawiin Lalduhoma chuan, "Nau hring tur san pe tawh ang mai a ni. ZPM thli tlehin Zoram hmun tin a nuai a, thingtlang kilkhâwrte pawh a nuai. Hei hi kan thawh rah a ni rêng rêng lo, Pathian hnenah lawmthu kan sawi tak meuh a ni," a ti.
ZLP Leader chuan, kalphung a ṭhat loh chuan ram a ṭhang thei lo tih sawiin, "Kalphung ṭha loah chuan mi ṭha pawh an ṭha thei lo. Kalphung ṭha kalpui tur hian ṭhalai ṭha kan mamawh. Sorkarna kan siam chuan development bank din kan tum a, mipui pawisa dah turin kan ngen dawn. Bul ṭanna nei lote kan pui dawn a ni," a ti a, ṭhalaite'n 'Kan ta' an tih theih tur sorkar siam an tum thu a sawi.
Political party-a awmte chu an party policy-ah an chian ṭhin thu sawiin Duhoma chuan, "MNF flagship policy chu mau kan ti thei ang, mahse, an vaiin an sawi thei lo. An hotupain a sawi ngat ngat a, a cabinet minister-te'n an sawipui thei lo," a ti.
ZPM president Lalliansawta pawhin thu sawiin, ZPM chu pawl naupang tak a ni chungin Pathianin mal a sàwm tih sawiin, "Kan ramah party pahnih an in-sorkar chhâwk a, hmasawnna tak tak hmuh tur a awm si lo. Ṭhalaite an mangang a ni. Ṭhalai rual kan ram tan an rawn pên chhuak hi a lawmawm tak zet," a ti a, ṭhalaite'n ZPM an zawm zel a beisei thu a sawi.
ZPM secretary general K Sapdanga chuan, "Mizoram political system siamṭhat a ngaih thu kan aupui ṭhin. Tun aṭanga kum 10 a ral hmain kan ram rorelna hi tuna ṭhalaite kutah hian a awm dawn a ni," a ti.
Inkhawm hi ZPM ṭhalai president Malsawmzuala'n a kaihruai a, ZPM MLA pahnih Vanlalhlana leh VL Zaithanzama te pawhin thu an sawi. ZPM tarlan danin, an party zawm thar an lawm luhte chu ṭhalai 56 an ni.