Covid-19 positive 69 hmu chhuak Ni khata hmuh chhuah tam ber ní

September 8, Thawh­lehni khan Mizoramah Covid-19 hripui vei mi 69 hmuh chhuah a ni a, ni khata state chhunga hripui vei hmuh chhuah tam ber ní a ni.

Hmuh chhuah thar zinga mi 13-te chu Mizoram chhunga kái chháwng (local positive contact) an nia hriat a ni a, an kaina àwm hriat loh mi pahnih dang an awm bawk. Nimin khan hripui vei dam tawh mi 00 chhuahtir an ni thung.

Mizoramah Covid-19 kai mi 1,192 hmuh chhuah a ni tawh a, chu'ng zinga mi 750 (62.92%) chu chhuak tawhin, mi 442 (37.08%) an la chhuak lo. La chhuak lo zingah hripui vei tawh lo (negative tawh) eng emaw zat an awm bawk.

Nimin khan Covid-19 vei dam tawh State Referral Hospital (ZMC) aṭangin mi pahnih, Covid Care Centre (CCC), Berawtlang, Lengpui CCC leh Dedicated Covid Health Centre, Serchhip aṭangin pakhat ṭheuh chhuahtir a ni.

Covid-19 vei Thawh­lehnia hmuh chhuahte chu mipa 62 leh hmei­chhia pasarih, Aizawl district-a sample lâk leh Zoram Medical College laboratory-a endik vek an ni a; a naupang ber chu kum khat mi a nih laiin, a upa ber chu kum 58-a upa a ni. ZMC laboratory-ah hian Thawhlehni khan mi 299-te swab sample endik a ni a; swab sample endikna hmun dangah hripui vei hmuh belh a ni lo.

Sorkar thuchhuah tarlan danin, ZMC laboratory-a Covid-19 vei hmuh chhuah zinga Mizoram chhunga kái chhâwng nia hriatte chu - Venghnuai mi paruk, Tuikhuahtlang mi panga, Bungkawn Vengthar leh Venghlui mi pakhat ve ve an ni. An vai hian hripui kai theia ngaih an nih avangin a hma aṭanga mahni ina lo inkhung tawhte an ni a, taksa lama harsatna nei (Covid-19 symptom lang) an awm lo.

Venghnuai mite chu - hmeichhe naupang kum 1 leh kum 9 mi te, mipa naupang kum 5 mi te, puitling mipa pahnih (kum 35 & 58) leh hmeichhia kum 40 mite an ni a; anni hi September 6, Pathiannia hmuh chhuah tawh Venghnuaia mipa pahnih, ITI Veng CCC-a chaw pe ṭhin (Dongdong Catering)-te chhungkhat laina hnai vek an ni. Hetih lai hian, naupang pakhat chu Tlangnuam veng mi a nih thu, Venghnuai aṭanga thu dawnna chuan a sawi.

Venghnuai aṭanga thu dawn danin, Dongdong Catering hian September 4, 2020-a Venghnuai LC inthlan hma chawlhkar khat chuang chu LTF duty-te ei tur a thláwnin an pe a, LC inthlan ní zing leh tlaiah inthlan buaipuitute chaw ei an siamsak bakah, a hma kárin an venga inneihnaah ruai an siamsak bawk. Hei vang hian, an thil siam eitu zawng zawngte leh LTF member-te, an vaiin mi 100 chuangte swab sample endik tum a ni. Venghnuaiah hian Covid-19 vei mi pariat an awm mek.

Tuikhuahtlang venga cheng mi pangate zinga pali - mipa kum 9 leh kum 43 mi leh hmeichhia kum 16 leh kum 18-te chu Covid Care Centre, ITI Venga thawk nurse, hripui vei tih September 6, Pathiannia hmuh chhuah tawh pasal fanaute an ni. Tuikhuahtlanga mi tho hmeichhia kum 56 mi erawh chu Zemabawk lama Covid-19 veite aṭanga kai a nih rin a nih thu, Tuikhuahtlang aṭanga dawn a ni.

Bungkawn Vengthara mi chu hmeichhia kum 29 a ni a; ani hi Venghnuai mipa pahnih, September 6, 2020-a hripui vei tih hmuh chhuahte nen September 3 zan khan kohhran ṭhalai hruaitute ṭhutkhawmnaah an telho vanga swab sample lâk a nih thu an veng YMA hruaitute'n an sawi.

Venghluia mi chu mipa kum 24 mi a ni a, a kài chhàwnna âwm hriat chian a ni lo. Chutih rualin, September 1, 2020-a ITI Venga CCC aṭanga Covid-19 positive la ni chunga chhuahtir mi pariat zinga pakhat, hnam dangte nena in (building) pakhata chengho an nih avangin, chuta ṭanga kai chu a nih a rinawm ber thu, Venghlui khawtlang hruaitute'n Vanglaini palai an hrilh.

Falkawn khuaa chêng mek hnam dang pahnih, construction company-a thawk mipa kum 20 ve ve pawh hripui vei hmuh thar zingah an tel a; anni hi state páwn lam mi ni mahse tun hnaiah state páwnah an zin chhuak lo a, an kai ṭanna awm hriat a ni lo a, Covid-19 symptom an nei lo.

Ṭhuampui helipad hmuna khung hran mek sipai (Indian army) zingah Covid-19 vei mipa paruk, kum 25-43 inkar mi hmuh chhuah a ni a, harsatna an nei lo. Border Security Force (BSF)-te tana quarantine centre siam, RAT, Falkland Venga khung hran mek BSF sipai zinga mi 48 pawhin hripui an vei tih hmuh chhuah a ni a; anni hi mipa kum 21-55 inkar niin, symptom nei lo vek an ni.

Hetih lai hian, September 8-a Lunglei Civil Hospital laboratory-a swab sample endik 14-te Rapid Antigen test hmanga sample endikte chu a negative vek tih hmuh a ni.