Zanlawnah oil leh gas zawngin Lei metre 115-a thûk verh tawh

Geology & Mineral Resources (GMR) minister H Rohluna leh amah puitu parlia­mentary secretary Joseph Lalhimpuia te chuan nimin khan Oil and Natural Gas Corporation (ONGC)-in Zanlawn rama hydro­carbon laih chhuah tuma hna thawh­na hmun an tlawh a; minister chuan a hma thei ang bera hna thawk zo turin a hrilh. ONGC hian metre 115-a thûk lei an verh tawh a ni.

Minister H Rohluna chuan, "ONGC-te hian ni 300 chhunga zo thei tur angin an insawi a, hei hi Central-in thla ruk a pawhsei sak tawh a ni. Chuvangin, a rang thei ang bera zo turin kan chah a ni," a ti a; tuna an hnathawh chin en chuan an thawk ṭha thawkhata an ngaih thu a sawi.

Zanlawn khaw dáia tuialhthei leh boruak alh thei zawn hna hi January 2015-ah ṭan a ni a, a hmunhma chu sq.km. 40,000 vela zau niin, lei verh hna bik chu April 24, 2015-ah ṭan a ni.

ONGC hotute chuan, lei metre 115-a thûk an verh tawh thu sawiin, a verh ṭanna lai chu lung chang a nih avangin duhthusamin an thawk chak thei lo tih an sawi a, "Lei verh tur china rua­hman chu km. 3.5-a thûk a ni a, km. 1.65 chinah hydrocarbon hmuh kan beisei," a ti a; km. 3 chinah hydrocarbon a awm ngei an rin thu a sawi bawk.

ONGC hotute chuan, hna thawh nan diesel leh petrol an mamawh tam a, a lak luh kawngah Vairengte checkgate-a an táng rei lutuk ṭhin chu an harsatna a nih tuh sawiin, chinfelsak turin minister H Rohluna chu an ngen a; H Rohluna chuan ziaka a hnena thlen tur leh chumi hnua hmalakpui a tiam a ni.

Minister H Rohluna leh parliamentary secretary Joseph Lalhimpuia te hi GMR director Dr H Lallenmawia leh Central YMA hruaitute'n an ṭawiawm a ni.