Biological Diversity Day hmang

Nimin khan Environ­ment & Forests department huaihawtin Kola­sib Diakkawn YMA Hall-ah International Day for Biological Diversity hman a ni a, E&F minister Lalrinmawia Ralte, Mizoram Biodiversity Board chairman ni bawkin a hmanpui.

E&F Minister chuan, nungcha chi hrang hrang - ramsa, sava, thing leh mau, thlai leh pangpar chi tinrengte chu mihring dam khawchhuah nan Pathianin a dah a ni tih sawiin, "Hei hi kan pawm thiam loh chuan Mizoram hi thlaler ramah kan siam ang tih a hlauhawm. Thil nungte kan tihchhiat a, kan suat a, kan tih chereu chuan a tuar ber tur chu mihringte kan ni," a ti.

Lalrinmawia Ralte chuan, kuthlei vang leh hmelma nia rin tlat vanga nungcha suat ṭhinte leh ngaihtuahna thui nei loa thing leh mau sah mai maite chu kalsan a hun tawh tih sawiin, "Pathianin mihring tana ro min pekte hi duat taka kan enkawl chuan nakin zelah khawvel hi chenna tlak, hmun nuamah kan siam thei dawn a ni," a ti a; nungcha chi tinrengte chu humhalh turin mipuite a sáwm a ni.

E&F Mi­nister chuan, Con­servator of Forests (Northern Circle) office chu kumin chhung ngeiin Aizawl aṭangin Kolasib-ah sawn beisei a nih thu a sawi a; Pangzawl khua nungcha, thing leh mau hausak dan chhinchhiahna People’s Biodiversity Register (PBR) Pangzawl a tlangzarh bawk.

Inkhawm hi E&F additional principal chief conservator of forests Rosiama Vanchhawng-in a kaihruai a; Mizoram University-a assistant professor Dr HT Lalremsanga, SIRD Kolasib-a core faculty ZR Ṭhafala leh Mizoram Biodiversity Board-a technical assistant Dr Lalneihpuia Chhakchhuak ten thupui chi hrang hrang an sawi.

International Day for Biological Diversity pual hian nimin khan Bikers Rally buatsaih a ni a, two wheeler ṭhahnem takin Kolasib aṭanga Kawnpui thleng kawng an zawh.

International Biodiversity Day hi United Nations General Assembly ruahmanna angin kum 1993-ah hman ṭan a ni a; kumina thupui chu 'Biodiversity for sustainable development' tih a ni.