PRISM-in power siamna man to an ti

PRISM chuan thu­chhuah siamin, Kau-Tlabung Mini Hydel project leh Tuipanglui Mini Hydel project-a kawlphetha siam chhuah chu khawvelah a to lawr lak niin an tarlang.

PRISM tarlan danin, Tuipanglui Mini Hydel Project aṭanga kawlphetha siam chhuah man chu unit khatah Rs. 93.72 a ni a, Kau-Tlabung Mini Hydel Project aṭanga kawlphetha siam chhuah man chu unit khatah Rs. 38.81 a ni thung.

Tuipanglui Project aṭangin a din tirh aṭanga chhûta power a siam chhuah tawh zawng zawng chu megawatt 3.97 a ni a, tunah erawh chuan he hydel project hman theih a ni tawh lo. Chutih laiin, project chu a tirah cheng nuai 980-a siam zawh tura tih a ni a, mahse kum 2001-a an revised ang chuan nuai 3,721 sen a ni. A siam nana sum sen leh kawlphetha a siam chhuah aṭanga chhûtin, kawlphetha man chu unit khatah Rs. 93.72 vel hû tihna a ni.

Kau-Tlabung Project siam nan a tirah cheng nuai 482 ruahman a ni a, kum 2001-a budget revised-ah erawh chuan cheng nuai 3,253.03 sen a ni. Siam zawh a nih aṭanga kawlphetha a siam chhuah tawh zawng zawng chu megawatt 8.38 a ni a, tunah hman mumal a ni tawh lo. Kau-Tlabung Project siamnaa sum hman leh kawlphetha a siam chhuah tawh aṭanga chhûtin, power unit khat siam nan Rs. 38.81 zel an hmang tihna a ni.

PRISM chuan, Tui­panglui leh Kau-Tlabung mini hydel project-te chu mi ṭhenkhatin dik lo taka thil an tihna nia sawiin, "Khawvela power siam chhuah man to lawr lak a nih avangin a mawhphurtute hi hum tum zel chi-ah kan ngai lo," an ti a; Sorkar leh sorkara thuneitu zingah mipui pawi khawihtute hum tuma hma la leh tlangau awm lo se an duh thu an sawi.