DC-in Phaizau mipui lungawi lohna sawipui

Phaizau mipuite'n an khaw kawngpui ṭhat loh vanga lungawi lohna lantirna tana Mamit khaw châwmtu PHE tui pump-na danchah an tum avangin, nimin khan Mamit DC Vanlalngaihsaka hoin district official leh Phaizau khuaa NGO hrang hrangte DC conference hall-ah an ṭhukhawm.

Vanlalngaihsaka chuan, invau zawnga thil kar ṭhin chu ṭha a tih loh thu sawiin, "Phaizau khaw kawng chhia hi kan ngai pawimawh em em a, a siam dan tur kawng hrang hrangin dap reng a ni. Kawng hi siam ṭhat a nih thuai theihna atan theihtawp kan chhuah a ni," a ti.

Phaizau NGO hruai­tute chuan, an kawng chhiat avangin zirna, eizawnna leh hmasawnna hrang hrangah an hnufual phah niin an sawi thung.

PWD SDO Lalbiakṭhuama chuan, PMGSY hnuaia hmalak mek a nih dan te, phase-8 hnuaiah Phaizau kawng chu telh a nih thu te, sorkar laipuiah DPR thawn a nih tawh thute sawiin, Phaizau NGO hruaitute'n an hriatfiah lohte chu a hrilhfiah a ni.

Phaizau NGO hruai­tute'n fûrpui thlen hmaa an khaw kawng siam ṭhat dan tur ngaihtuahpui tura an ngenna chhangin, Mamit district thuneitute chuan, hmalak mek a nih thu leh bawhzui zel dan tur ngaihtuah zel a nih tur thu an sawi.