MPCY-in CYMA hmalakna thlawp

MPC party ṭhalaite chuan thuchhuah siamin, Central YMA-in ram leh hnam humhalh nana Bangladesh aṭanga Chakma lo lut rûte dapchhuah nana Chakma foreigner chhiatpui May 2015-a ṭan an tum chu lawmawm an tih thu an tarlang.

MPCY chuan, Central YMA hmalakna duh lo a, a dodal zawnga hmalakna awm apiang chu sutkian zel ṭha an tih thu an sawi a, "CYMA-in Chakma foreigner chhiarpui neih tura an hmalakna hi a hlawhtlin hma chu theihtawp chhuahin kan ṭawiawm zel dawn a ni," an ti.

MPC ṭhalaite chuan, an party dintu Brig. T Sailo kaihhruai PC sorkar laiin Mizorama phalna nei loa Chakma lut rute zinga mi 11,169 chu India sipaite nen ṭangkawpin bangladesh-ah an hnawt kîr niin an sawi a; a hnua sorkarna changtute'n Chakma foreigner-te an ngaimawh lo a, ram leh hnam humhalh tumna aia Chakma-te vote an duhthawh zawk avangin Mizoramah dan loa lut Chakma an pun chak phah niin an sawi bawk.