Eirûte thlavâng hauhah sorkar puh

Zoram Nationalist Party chuan thuchhuah siamin, Mizoram sorkar, Congress party sorkar chu eirûknaa inhnamhnawihte thlavâng hauha hum tumah an puh.

ZNP chuan, minister Lal Thanzara'n May 21, 2015-a Mizoram Engi­neering Service Asso­ciation conference-ah, 'Sorkar hnathawk an eiru ngei tih finfiahte chu kan dîm ngai lo,' tia a sawi chu an chháng a; ACB-in Kau-Tlabung leh Tuipanglui mini hydel project an chhuinaa May 13, 2010-a engineer pariat laka thubuai siam tura tih, Congress sorkarin July 2, 2010-a hnûkdâwk tura ACB a hriattirna chhan sawi turin sorkar an zâwt lêt a ni.

Kau-Tlabung leh Tuipanglui MHP-a eirukna thubuaia Gauhati High Court, Aizawl Bench-in March 17, 2015-a thu­tlukna a siam, engineer pariatte laka eiruk thubuai siam tura ACB a hriattir chu Congress sorkarin Supreme Court-ah a khinglet tih sawiin, ZNP chuan, "Supreme Court-in thu tling loah ngaiin a lo hnawlsak a, hei hi eirukna an do ve dan em ni?" an ti.

ZNP chuan, "Kau-Tla­bung leh Tuipanglui MHP hnathawh lai khan, khatih laia PWD leh P&E changtute khan inhnam­hnawihna nei lo se, he sorkar hi eirua puhte thubuaiah a inrawlh lo ang a, Supreme Court-ah a khinglet lo ang tih hi mipuiin lo hre nawn turin kan ngen a ni," an ti bawk.