AMC-in hotel & restaurant an endik

Aizawl Municipal Corporation (AMC)-a Committee on Regu­lations of Restaurant, Hotel & Hostel hotute chuan ruahmanna an siam tawh angin, nimin aṭang khan Aizawla hotel leh restaurant-te an endik ṭan a, endik chhunzawm zel an tum.

AMC Committee on Regu­lations of Restaurant, Hotel & Hostel hotute hian Aizawla hotel leh restaurant-te'n AMC-ah registration an neih leh neih loh te, bawlhhlawh an thliar dan te, hmunhma a fai dante an endik a; AMC registration leh dawr licence nei lo tam tak an awm tih an hmu chhuak.

AMC registration leh dawr licence nei lote chu November 2024 chhunga registration ti a, license nei turin an hriattir a; hun an pek chhunga an neih loh chuan dawr khàrsak emaw, AMC Licensing Regulations 2012 sawi angin Rs 5,000 thleng chawitir an nih tur thu an hrilh.

Committee-ah hian chairman chu Rosiamngheta niin, secretary chu H Lalremtluanga a ni a; member-te chu Chuauzikpuii, Zodingpuii, C Lalchhandami leh David Zohmangaiha te an ni.