SHC sorkar thar lak luh a ni

Kumina Sinlung Hills Council inthlanpuia thlan tlin member 12-te chu nimin khan Aizawl Bawrhsap Pisapui Hall-ah rinawmna thu tiamtira lak luh an ni a; chief executive member (CEM) atan Ricky Lalremsanga lak luh a ni.

Lak luhna inkhawmah hian Aizawl bawrhsap Lalhriatpuia'n SHC sorkar thara hotu turte chu rinawmna thu a tiamtir a; CEM atana lak luh Ricky Lalremsanga chu Vanbawng bial aṭanga thlan tlin a ni. Executive member atan mi pali - Melody Lalchhuangzeli (Sakawrdai North bial), Lalhmingthanga (Ratu bial), Lalhriatchhunga Hmar (Sakawrdai South bial) leh Zokhumthanga (Saiphai bial)-te lak luh an ni bawk.

Nimin vek khan SHC protem chairman Lalhmingthanga kaihhruaiin chairman leh deputy chairman tur thlan a ni a; chuhtu dang awm loin chairman atan R Lalfakzuala (Ṭinghmun bial) leh deputy chairman atan Benjamin Lalrawnliana (Zohmun bial) thlan tlin an ni.

SHC sorkar lak luh chungchangah hian MNF chuan thuchhuah siamin, "Thlan tlinte'n tluang taka sorkarna siama sorkar thar din a ni ta hi lawmawm kan ti. MNF leh HPC(R) thawh dunna hnuaiah hmasawnna ṭha tak thlen tur leh Council chhung mipui hamṭhatna tura theihtawp chhuaha thawk turin duhsakna kan hlan a ni," an ti.