CM hoin health care thlirho

Mizoram State Health Care Scheme Governing Body chu nimin khan an chairman Zoramthanga, chief minister hoin CMO conference hall-ah an ṭhukhawm a, October 1, 2019 aṭanga September 3, 2020 thlenga Revised Mizoram Health Care Scheme hnuaia ham­ṭhatna pek dan an thlir.

Meeting-a tarlan danin, October 1, 2019 aṭanga kumin September 3 thlengin Revised Mizoram Health Care Scheme hnuaiah mimal damdawi-ina inenkawl mi 7,435 leh sorkar damdawi-ina inenkawl mi 4,190 tan Rs. 32,59,88,780 pek chhuah a ni tawh. Scheme hnuaiah hian damdawi-ina riak lutte bakah, natna chi hrang 26-a damdawi-in OPD-a inenkawlna a huam a ni.

AB PM-JAY hnuaia inenkawlna man bill peksak chu Rs. 19,69,­17,804 a ni a, chu'ng zinga mi 16,906 chu sorkar damdawi-ina inenkawl an nih laiin, mimal damdawi-ina inenkawl mi 2,084 an awm bawk.

Ṭhutkhawmah hian district tina Health Care Scheme an hman dan a rualkhai loh thu sawi a ni a, inhrilh chianna leh inzirtirna ṭha zawk neih pawimawh an tih thu an sawi. Dilna lut zawng zawng aṭanga natna thliar chhuah aṭangin cancer inenkawlna a langsar ber a ni.