Sport minister Lalnghinglova'n Union Sport Minister a kâwm

Sports & Youth Services minister Lalnghinglova Hmar chuan nimin chawhnu khan Union Youth Affairs & Sports minister Dr Mansukh Mandaviya chu Delhi-a a pisaah a kâwm a, Mizoram mamawhte a thlen.

Lalnghinglova Hmar chuan, India ramin Olympic Games 2036 thlen a tumnaah Mizoram aṭanga infiammite an tel ve ngei a duh thu a sawi a, "Hemi inbuatsaihna atan hian Mizoram Sports Conclave pawh June 13-14, 2024 khan hlawhtling takin buatsaih a ni tawh. Sorkar flagship scheme Bana Kaih hnuaiah Mizorama sports coaching lian tham bul ṭanna tur ruahman a ni," a ti.

Mizoram chu state tê a nih avangin sport budget pawh a tam thei lo tih sawiin Lalnghinglova chuan, "Infiamnaa Mizoram hmachhawpte hlawhtlinna’n sorkar laipui puihna kan mamawh," a ti a; sorkar tha chakna belhchhah turin corporate leh PSU hrang hrangte dawr kual mek a nih thu a sawi.

Union Sports Minister chuan Mizoram Sports Minister hmathlir leh, Mizoram sorkarin hma a lo lak tawhnate chu fakawm a tih thu a sawi a, pawisa dil tur ringawt ni lo, vision mumal tak nei chunga mamawh a thlen ṭhin chu lawmawm a tih thu a hrilh bakah, sports infrastructure leh thildang a ṭulna apiangah a puih tur thu a sawi bawk.

Dr Mansukh Mandaviya chuan, state hrang hranga sports minister-te leh PSU-te joint meeting neihpui a tum hnai tih a sawi a; state-a sports department leh PSU-te awmze nei zawka thawhho theih dan tur, one state - one PSU model buaipui mek a nih thu a sawi bawk.

LESDE minister ni bawk Lalnghinglova Hmar hian Ministry of Labour & Employment secretary Sumita Dawra pawh a kâwm a, Mizoram mamawh hrang hrang a sawipui a ni.