KHAWTHLIR

MLA-in tlawh

R Rohmingliana, MLA chuan October 21-22, 2024 chhunga New Delhi-a India ram state hrang hranga MLA-te tana law & justice chungchanga an zirte Mizorama kalpui tur chin hriat chian a duh avangin nimin khan Central Jail leh Mizoram Forensic Science Laboratory a tlawh. New Delhi-a workshop an neih ṭuma an ngen angin, a hmuh dante report a tum thu a sawi.

DC-in charity pe

Lunglei bawrhsap R Lalṭhazuala chuan nimin khan Baptist Church of Mizoram (BCM) Headquarters, Serkawn tlawhin, BCM hotute a kâwm a, Lunglei district administration-in kohhran aṭanga thlàwpna leh thawhpuina ṭha tak a dawng ṭhin chu lawmawm a tih thu a sawi. BCM-in Krismas puala mi harsate tana ṭanpuina an khawn tur (charity)-ah DC office hmingin Rs 50,000 a hlan a ni.

Press Day hmang

Mizoram Journalists' Association (MJA), Kolasib District chuan nimin khan Kolasib Press Club-ah National Press Day an hmang a, Kolasib bawrhsap Robert C Lalhmangaiha'n a hmanpui. Inkhawm hi MJA, Kolasib District vice president C Zomuanpuia'n a kaihruai a; Kolasib DC bakah, Kolasib MJA president Andrew Vanlalauva ten thu an sawi.

Redressal Cell din

Mamit DC Jacob Lalawmpuia chuan thuchhuah siamin, ‘The Mizoram Bana Kaih (Handholding) Scheme’ hnuaia thlai thlan bik lei leh hralh chungchanga harsatna thlenna turin DC office-ah Grievance Redressal Cell din a nih thu a tarlang. Harsatna nei tan Addl. DC phone 8414917324, DO (soil) phone 9862631396, ADAO phone 96121­92804 leh ADHO phone 8974235600-ahte zawhfiah theih a nih thu a tarlang bawk.

Kawng endik dawn

Serchhip DC chuan thupek chhuahin, Serchhip khawpuia kawngpui tihnawk leh tichêp zawnga bungrua leh lirthei dahte Road Protection Squad-in an endik dawn thu a tarlang. Mipuite chu vantlang tana hnawk leh kawngpui nêk chêp zawnga bungrua leh lirthei dahte senghawi turin a hriattir a; kawngpui dunga motor sil, iron rod chhut leh cement chawhte ti lo tura hriattir an ni bawk.