ZPM sorkarah mipuiin rinna an nghat - PWD Minister

PWD minister Vanlalhlana chuan nimin khan ZPM pisaa inkhawmah thu sawiin, ZPM sorkarah mipuiin rinna an nghat a, theihtawp an chhuah zel dawn thu a sawi.

Vanlalhlana chuan, sorkarin hna thawk ṭha mah se, eptu party-te'n phunnawina leh sawisel tur an zawng zel tho tih sawiin, "Nimahsela, mipui hian ZPM ministry-ah rinna an la nghat nghet hle a, keini pawhin theihtawp kan chhuah zel dawn ni,” a ti.

Khaw awm danin a zir tâk avanga kawngpui siam hna thawh theih a ni ta chu lawmawm a tih thu sawiin Vanlalhlana chuan, "Tun hma chuan ‘kawng hmangin sum an siam’ tih ṭawngkam kan hre ṭhin a, kalphung thar mipui sorkar hnuaiah chuan sorkar sum dik taka hmangin kawng siam ṭhat hna kan thawk mek a ni," a ti. Mizorama kawngpuite chu PWD enkawl vek a ni lo a, NHIDCL leh BRO an chêt muang ṭhin avangin PWD an chêt chhuah a ngaih fo thu a sawi.

PWD Minister chuan, Cyclone Remal vangin kuminah leimin a tam a, hmun 576-ah kawngpui hnawh khawp leimin a awm thu a sawi a, "Sorkarin theihtawp chhuah mah ila khaw awm danin a zir loh avangin chak takin hma kan la thei lo. Kan theih ang angin hmun hrang hranga kawng chhiate thawm ṭhat a ni a, theihtawp kan chhuahna hai derin eptu party-te'n nasa takin politics-a inbeih nan an hmang a, khaw ṭha min pe thei bik lote khan kawng ṭha pek an phût a, mahse, mipuite'n min hrethiam hlein ka hria," a ti.

Vanlalhlana sawi danin, Mizoramah kawngpui km. 7,723.18 a awm mek a, chu'ng zinga km. 605 chu national highway niin, state highway km. 371 a awm. Mizorama blacktop kawng thui zawng chu km. 6,706 a ni a, blacktop loh km. 1,106 a awm a ni. Mizoramah lei (bridge) 123 a awm bawk.