Aikal lâk khap, etc avangin sorkar hnathawkte an beidawng - Lalruatkima

MNF treasurer Lalruatkima chuan, aikal lâk khap, office ṭan hun leh bàn hmaa chhuahsan phal loh tihte avangin sorkar hnathawkte an beidawng mek nia sawiin, ZPM sorkar chu sorkar hnathawkte nêkchêptu niin a sawi.

Lalruatkima hian nimin khan Mizo Hnam Rûna inkhawmah thu sawiin, "ZPM sorkar hi sorkar hnathawkte nêkchêptu, aikal lâk khap, office ṭan hun leh bàn hmaa chhuahsan phal loh leh an awmna chin hriat theihna apps an hmang ṭan dawn. Sorkar hnathawkte an beidawng mek," a ti a; sorkar hnathawkte'n MNF sorkar leh hun an nghakhlel hle nia sawiin, ram, hnam leh sakhua a him theih nan hma lam pan turin an party mite a fuih.

Lalruatkima chuan, ZPM chu Sinlung Hills Council inthlanah mipui ngaihzawn an nih loh avangin an hlawhtling lo niin a sawi a, "Kalphung thar sorkara kan beiseina zawng zawng chu thuneihna duh luat vanga vote zawnna mai a lo ni tih mipuiin kan hmu chho mek a, inbumna leh intihdernaah mipuite'n kan ngai zo ta. An campaign auhla enchhin tih chu inchhirah a chang zo ta," a ti.

MNF Treasurer chuan, "Kumpuan nei ta ila, kum 2024 hi enchhin aiah inchhir kum tih ni se. Kum 2025-ah pawh inchhir kum, kum 2026 leh 2027-ah pawh inchhir kum a ni ang a, kum 2028 chu inchhir avangin inlamlêt kum a ni ve thung ang,” a ti a; ZPM sorkarah mipui an beidawng mek niin a sawi.

Kalphung thar chu inbumna leh intihderna mai a nia sawiin Lalruatkima chuan, "Campaign laia an thusawi loh ang hlirin ram an kaihruai a, mipui kan beidawng a, a chang leh kan nuih a za, kan thinrim a nih hi. Dâwt ngialngan sawi hrat CM kan nei hi kan vanduaina tizualtu a ni," a ti.

Ram leh hnam tana MNF sorkar hmalaknate leh party dang sorkar hmalak lohnate sawi langin MNF Treasurer chuan, "Tun hnaiah Manipur-a kan unaute'n harsatna nasa zawk an tuar a, MNF sorkar laia an thlamuan ang khan ZPM sorkarah hian an thlamuang meuh em?" a ti a; Manipur-a Zo hnahthlakte thlavang hauhna kawngah Mizoram sorkar chu a reh vang vang niin a sawi.