Education Minister-in sikul a tlawh
School Education minister Dr Vanlalthlana chuan Aizawl South-II bialtu MLA sawmna bawhzuiin nimin khan Tlangnuam Primary School I & II a tlawh. Nimin vek khan a bial Aizawl North-II chhunga sikul hrang hrangte tana ṭhutthleng leh dawhkan MLA fund aṭanga a pek a sem bawk.
Kum 1978-a din Tlangnuam P/S-II a tlawhnaah Dr Vanlalthlana chuan sikul dinhmun a enfiah a, "Mizoramah hian zirna in sak ṭhat tur tlabal tawh tak tak a tam a, sorkar lu pawh a hai ṭhin hle. Theihtawp kan chhuah zel dawn a, Chief Minister-in sikul 50 sak ṭhatna tur min ruahmanpui a, chu'ng zingah chuan he sikul hi a tel theih nan hma kan la dawn a ni," a ti.
Aizawl South-II bialtu MLA Lalchhuanthanga pawhin, “Zirna ka ngai pawimawh em em a, kan ngennate Minister-in a rawn tihlawhtling hi ka lawm hle. Hma kan la zel ang a, hlawhtlinna lo thleng tur beiseiin zirna hmasawnna kawng kan ngaihtuah zel dawn a ni," tiin a sawi.
Education Minister hian nimin khan a bial chhunga sikul hrang hranga hman tur ṭhutthleng leh dawhkan semna hun a hmanpui a; a MLA fund hmanga siamtir dawhkan 30 leh ṭhutthleng 30 chu sikul hrang hrang hnenah a hlan a ni.