LMC-in state sorkara thlen rêl

Municipal Sanitation Committee for Lunglei Municipal Area chu nimin khan an chairman K Lalrinawma, Lunglei Municipal Council (LMC) vice chairman kaihhruaiin LMC BoC Hall-ah an ṭhukhawm. Lunglei khawpui tana bawlhhlawh paihna hmun, Solid Waste Management Centre sak mek chu siam zawh thuai a nih theih nan hma laksak turin state sorkara thlen an rêl.

Ṭhutkhawmah hian, Lunglei Solid Waste Management Centre sak mek chu a rang lama siam zawh a nih theih nan hma laksak turin sorkarah thlen ni se, an ti a; LMC huam chhunga local council-te bawlhhlawh thlahdah awm lohna (garbage free) ni vek tura hmalakna kalpui an rawt bawk.

Municipal Sanitation Committee for Lunglei Municipal Area-in a rel tawh angin, faina lamah hmasawnna a awm theih nan ward/local council inelna turin LMC Award kalpui mek a ni a; pakhatnain Rs 3,00,000, pahnihnain Rs 2,00,000 leh pathumnain Rs 1,00,000 an dawng dawn a, ward pakhat tan consolation prize Rs 30,000 ruahman a ni.

Inelna endik hun tur chu LMC Chief Executive Officer leh Secretary-te ruahmanna anga kalpui a ni dawn. Bawlhhlawh khawn chungchangah, veng pasarih aṭangin LMC motor hmanga bawlhlawh la khawma paih a ni a, a bak veng dangte chuan mahni remchan dan angin bawlhlawh an paih thung.