Bana Kaihah November 2024 china dilna lutte endik hmasak a ni dawn

Mizoram State Policy Coordination Committee chu nimin khan Planning committee room-ah adviser to chief minister (Handholding) Dr KC Lalmal­sawmzauva hoin an ṭhukhawm a; Bana Kaih scheme thawh khatnaah November 2024 china dilna lutte endik hmasak a nih tur thu a sawi.

Dr KC Lalmalsawm-zauva chuan, Bana Kaih chu hlawhtlin tuma thiamna leh theihna nei, mi tumruhte kaih chhuahna tur a nih thu sawiin, "A thawh khatna atan November china dilna lutte endik hmasak a ni dawn. Implementing department-a nodal officer-te'n uluk tak dilnate an zir chian hnuah Apex Body-ah endik leh a ni ang," a ti.

Ṭhutkhawmah hian Labour, Employment, Skill Development & Entrepreneurship (LESDE) department leh Bana Kaih scheme kal kawp theih dan tur te, pilot phase atana progress partner thlan chhuah hmaa scheme kalpui dan tur zirchianna buatsaih dan turte leh pilot phase atana sum mamawh zatte sawiho a ni.

Meeting-a tarlan danin, implement-ing department aṭangin dilna 8,370 a lut tawh a, implementing department-a nodal officer leh search team-te'n zirchianna kalpui a ni tawh. Commerce & Industries department-ah dilna lut a tam ber.

Dilna lut tawh chu Aizawl district aṭangin 1,741, Lawngtlai district aṭangin 1,413, Champhai district aṭangin 1,228, Mamit district aṭangin 715, Kolasib district aṭangin 702, Siaha district aṭangin 667, Saitual district aṭangin 567, Lunglei district aṭangin 578, Serchhip district aṭangin 349, Khawzawl district aṭangin 326 leh Hnathial district aṭangin 84 a lut tawh a ni.

Implementing department hnuaia nodal officer leh search team-te endik hnuah pilot phase atana Apex Body-te ennawn leh turin dilna 190 thehluh a ni.