Rinthu nena mi dangte dik lo taka puh hi sim a hun tawh - Rinliana Sailo

BJP, Mizoram Pradesh chuan nimin khan Aizawla an pisaah inkhawm an buatsaih a, thu sawitu Mizoram BJP Core Group member Lalrinliana Sailo chuan, politics-a rinthu nena mi dangte dik lo taka puh chu sual lian tak a nih avangin sim a hun tawh thu a sawi.

Lalrinliana Sailo chuan, politics thianghlim khelh a ngaih thu sawiin, "Politics hi party inbeihna atan maia hmang loin, ram chanchin ṭha kan thlenna hmanrua atan leh mipui hamṭhatna hmanrua atan a kalkawng a ni a tih kan hriat thar a pawimawh. Rinthu nena mi dangte dik lo taka puhte hi sual lian tak a ni a, kan sim a hun tawh tak meuh," a ti.

15th Finance Commission-ah Mizoram dinhmun a ṭha lo nia sawiin Lalrinliana chuan, "Mizoram sorkar hian puitu a ngai a, amah mai chuan inhai chhuah ngaihna reng reng a nei dawn lo. Chuvangin, Mizoram sorkar hian puitu tur a zawn thiam a, inngaitlawm taka hma a lak chuan Mizoram hma lam hun a êng ve thei ngeiin a rinawm," a ti a; inngaihtlawmna nen Mizoram kaihhruai a, Pathian duh dana hmalak a ṭul thu a sawi.