Rajya Sabha MP-in sorkar laipui policy Mizo mipuite'n chhawr ṭangkai se a duh
Rajya Sabha MP K Vanlalvena chuan, Covid-19 vanga harsatna a awm mek laiin, sorkar laipuiin Covid-19 do lêtna tura a duan Atma Nirbhar Bharat Abhiyan (Self-Reliant India Mission) chu Mizo mipuiin chhawr ṭangkai se a duh thu a sawi.
K Vanlalvena hian nimin khan Aizawl Press Club-ah thuthar thehdarhtute a kâwm a; Covid-19 hriin ram hausa leh rethei a thliar lo a, Mizoram pawh hripui kaihhnawih harsatnain a tuam mek tih sawiin, "Covid-19 avangin ram insumdawn tawnna, ram chhunga inkalpawhna, thil siamna leh sumdawnna hmunte khâr a nih vangte leh industry leh company hrang hrang hna thawk thei loa an awm vangtein India ram sum deh chhuah leh ei leh bar dinhmun nasa takin a tlahniam mek a ni," a ti.
Covid-19 léng vanga India ram pum economy tlahniam mekin harsatna lian zawk a thlen lohna tur leh India hma lam hunah retheihna vanga buaina thleng theite pumpelh a nih theih nan sorkar laipuiin ruahmanna a siam thu sawiin MP chuan, "Ni 12.5.2020 khan PM Narendra Modi chuan Covid-19 do lêtna policy thar, Mizo ṭawng chuan 'India ram intodelhna tura beihpui thlakna' a tlangzarh a ni," a ti a, sorkar laipui ruahmanna siam thar chu Mizo mipuite'n chhawr ṭangkai se a duh thu a sawi.
Self-Reliant India Mission kalphung
• Covid-19 vanga India ram economy hniam mek chawikanna tur SRIM tihhlawhtlinna atan sorkar laipuiin cheng vbc. 20,00,000 a dah a, chu chu India ram GDP aṭangin 10% vel a ni.
• SRIM policy atana central sorkarin sum a ruahhman 75% vel hi bank kaltlanga loan hmanga pek tur a ni a, 25% vel chu grant system hmanga pek tur a ni. State sorkar sum báwma khung tur a nih loh avangin state sorkar-te'n mawh an phur lutuk thei lo a, mipui leh bank thawhhona ṭha aṭanga tihhlawhtlin tur a ni.
• SRIM kalpui dan tur chu hlawm lian pangaah ṭhen a ni a, chu'ng zingah chuan Mizoram tana ṭangkai nghal mai thei lote a awm rualin, a taka hman nghal mai theih tam tak a awm.
• MSME (Micro, Small, Medium, Enterprise) atan cheng vbc. 50,000 dah a ni.
• Additional Emergency Working Capital through NABARD hnuaiah cheng vbc. Rs. 30,000 dah a ni.
• Agri Infrastructure Development Fund-ah cheng vbc. 1,00,000 a awm.
• Animal Husbandary & Fishing Development Fund hnuaiah cheng vbc. 15,000 dah a ni.
• Promotion of Medicinal Plant Cultivation atan cheng vbc. 4,000 ruahman.
• Beekeeping Initiative Fund atan cheng vbc. 500 dah a ni.