KHAWTHLIR

Mizoram Gorkha Youth Association, Bawngkawn Branch chuan nimin khan Synod Hospital Blood Bank-ah thisen unit 25 an pe a, petute mipa 23 leh hmeichhia pahnih an ni. Nimin vêk khan State NSS Cell ruahmanna angin zirna-in pathuma NSS volunteer-te’n thisen unit 30 an pe a, mipa 24 leh hmeichhia paruk an ni a; MZU aṭangin mi 14, T Romana college aṭangin paruk leh Central HSS aṭangin 10-in an pe a ni. Lunglei Salem Unit ṬKP member mipa 19 leh hmeichhia pakhatte’n Lunglei Civil Hospital-ah thisen unit 20 an pe bawk.

Assembly deputy speaker Lalrinawma chuan a bial, Tuikum constituency-a a model village atan Khawbél a thlan thu, September 8, Thawhlehni khan a puang. Model village puanna inkhawmah Lalrinawma chuan model village kalphung a sawifiah a, ram leh hnam bakah, khawtlanga zirna, faina, hriselna kawnga hmasawn lehzualna atan thawhpuiah a sáwm a ni.

MBSE chuan October 16, 2020 khian Mizoram Teacher Eligibility Test (MTET) exam a buatsaih dawn. Sorkar thuchhuah tarlan danin, MTET information brochure leh application form chu MBSE website www.mbse.edu.in ah lak (download) theih a ni a, dilna leh exam fee chu September 7-22, 2020 chhungin MBSE office, Chaltlang leh MBSE regional office, Lungleiahte thehluha pek theih a ni. September 25, 2020 thlengin late fee Rs. 300 chawi belhin dilna thehluh theih a ni bawk.

Mizo Students’ Union (MSU) Gen.Hqrs chuan naktuk, September 11 hian ‘Zo Hnam Chhan Ni’ an hmang dawn. He ní-ah hian hnam dangte dawr lo a, Mizo chauh dàwr turin Mizo mipui an ngen a; Mizorama hnam dang dâwr zawng zawngte chu inhawng lo turin an hriattir bawk.

Legal Metrology enforcement staff chuan nimin khan Mission Venga dawr pakhatah silai mû (16 bore) zawrh lai an endik a, MRP aia sanga dawr neitute'n an hralh vangin báwm 21 leh catridges pakua an man. Silai mu báwm pakhat (cartridges 10 awmna) chu maximum retail price (MRP) Rs. 1,200 a nih laiin, Rs. 2,500 zelin an hralh ṭhin niin an sawi. 

PRISM party chuan nimin khan thuchhuah siamin, Aizawl Municipal Corporation (AMC) inthlan turah an party hminga chuh ngei an tum thu an puang. PRISM chuan, "Aizawl khawpui enkawltu ṭha tak thlan chhuah a nih leh ngei theihna turin candidate ṭha tak chhawp chhuak tura hmalak ni se kan ti," tiin an tarlang.

State Referral Hospital-ah nimin khan Covid-19 vei mi 11 leh rinhlelh mi pahnih dah luh an ni a, mi pahnih chu ITI Venga CCC-ah sawn an ni thung. SRH-ah hian hripui vei vanga enkawl mi 64 an awm mek a, an zinga pahnih chuan khawsik leh thawhah nasa vak lo an nei tih, SRH-ZMC Bulletin chuan a tarlang.

Hualngohmun, Melriat leh Kelsih khuaa ar vulhtu chhungkua ṭhahnem takin Covid-19 vei an neih avang leh positive hnimhnaih an neih avangin AH&Vety minister Dr K Beichhua hmalaknain sorkarin ar chaw tam tham tak a pe.

MNF party thuchhuah tarlan danin, khaw pathumah hian Covid-19 vei leh positive contact eng emaw zat an awm avangin ar vulhtu mi eng emaw zatte‘n ar an hralh thei lo a, ar chaw pe (supply) ṭhinte pawhin an pe duh rih lo a ni. An harsatna chu Dr K Beichhua chuan hriain, ar an vulh zat leh ar chaw an mamawh zatte hre turin AH&Vety department mite a enfiahtir a, department-in chhawmdawlna a pe ta a ni.

Mizoram sorkar chuan Melriat khuaa ar vulhtu chhungkaw 63-te ár vulh lai 11,330 châwmna atan ár chaw an mamawh zat kg. 19,012 chu a man chanvein pek a ni a, Hualngohmun leh Kelsiha ar vulhtu chhungkua 35-te ar vulh lai 11,690 tan ar chaw kg. 19,638 pek 

a ni bawk.