Kolasib leh Hnahthial district-ah TrueNAT laboratory hawn a ni

Kolasib District Hospital leh Hnahthial District Hospital-a TrueNAT laboratory buatsaih tharte chu nimin khan hawn a ni.

Kolasib-a TrueNAT laboratory hawngtu minister of state K Lalrinliana chuan, Mizoram district tinah TrueNAT laboratory dah vek a nih theih nan Chief Minister leh Health Minister-te'n hma an la tih sawiin, chu'ngte chu Covid-19 donaah hmanraw ṭangkai tak a nih tur thu a sawi.

K Lalrinliana chuan, TrueNAT Quattro Mini PCR-ah a rualin swab sample pali en theih a nih thu sawiin, "Sample en theih tura puahchahna khawl pahnih awm mekin, tun dinhmunah chuan ni khatah sample 20-30 vel en hman tur a beisei a ni a, sample endik tura sawngbawlna khâwl hi neih belh tura hmalak a ni," a ti.

Mithiamte chhût danin, kumin December-ah chuan Mizoramah Covid-19 kái mi 5,000 an tling tura ngaih a nih thu sawiin, "An chhût ang kan tlin lohna turin mi tin fimkhur taka kan awm a, sorkarin inkaihhruaina a siamte zawm hram hram a ngai. Covid-19 vanga sum tam tak luang ral tur te, harsatna thleng thei te, hri doa hah taka thawkte hahna belh chhah theihte hi kan fimkhur tlân chuan kan chhâwk thei a ni," a ti a; Mizoram chu hripui donaah India rama ti ṭha ber pawl a nih thu a sawi.

Kolasib-a TrueNAT laboratory enkawl tur hian medical officer pakhat, laboratory technician pahnih, data entry operator pakhat leh group-D staff pakhat an awm. A hawnnaah hian bawrhsap Dr H Lalthlangliana, medical superintendent, doctor leh damdawi-ina thawkte an tel.

Hnahthial damdawi-ina TrueNAT laboratory siam thar chu district bawrhsap Vanlalmawia'n a hawng a, a hawnnaah Hnahthial SP Lalbiakkila chu khualzahawm a ni.

Hnahthial DC chuan, Hnahthialah TrueNAT laboratory bun a ni leh hman ṭan theih a ni ta chu lawmawm a tih thu sawiin, "Covid-19 beihnaah a ṭangkai hle dawn a, Covid-19 mai bakah, medical test dang tam tak a tih theih dawn a ni," a ti a; hripui chu hneh a nih theih nan sorkar ruahmannate thuawih taka zâwm turin mipui a ngen.

Medical officer Dr Lalrengpuii Ralte chuan, Hnahthial district-a mi 248-te swab sample ZMC laboratory-ah endik a ni tawh a, chu'ng zinga mi pahnih cuan hripui an vei thu leh, Rapid Antigen Test hmanga mi 51 endik tawh zingah vei hmuh a la nih loh thu a sawi.

Hnahthiala TrueNat Quattro mini RT-PCR hawn thar hmang hian nimin khan mi parukte swab sample endik nghal a ni.