Rajya Sabha MP-in sorkar laipui policy Mizo mipuite'n chhawr ṭangkai se a duh

K Vanlalvena chuan, Self-Reliant India Mission (SRIM) atan sum ruahman aṭangin cheng tluklehdingawn 1,900 chuang chu Mizoramin a thâl ve theih huanga mi nia a lan thu a sawi a, "Sorkar laipui duh dan angin Mizorama bank awm zawng zawng hian Mizoram mipui khai chhuahna turin a tam thei ang ber loan pe tura kan inbuatsaih thuai thuai hi kan tihmâkmawh a ni. Mipui pawhin bank nena indawr a, ruahmanna ṭha siam tura kan inbuatsaih a hun," a ti.

MP K Vanlalvena chuan, sorkar laipuiin RBI leh bank hrang hrangte hmanga Covid-19 dona tur policy ṭha tak a duan zûlzuiin Mizoram mipui leh bank-te an ṭan rual a, Covid-19 vanga Mizoramin harsatna lian a tawh lohna tur leh a dinchhuah phah zawkna turin 'Self-Reliant Mizoram Mission i kalpui ve ang u' tiin mipui a sáwm a ni.

Rajya Sabha MP chuan, "Mi ropuite leh hnam ropuite chuan khawvela harsatna leh buaina thleng chu dinchhuah nan an hmang ṭhin. Zo fate pawh hi Pathian leh a chanchin ṭha neitute kan nih avangin Covid-19 leh a behbâwm harsatna hian min hneh thiang lo a, kan hnam ropuina leh dinchhuahna hmanrua atan kan hmang zawk tur a ni," a ti.

K Vanlalvena chuan, hripui leng chu ramin hun rei tak chhung chu economy lamah a chhiat phah dawn tih sawiin, "Mizo mipui, mahnia dingchhuak thei turin Covid-19 hi ṭan lakna atan hmang ila a duhawm hle. Covid-19 darh hlau tak chung siin bungraw lak luhna atan kan ramrite kan hawng lo thei lo a, kan hawn loh chuan ei leh barah harsatna kan tâwk dawn a ni," a ti a; SRIM hmang ṭangkai a, intodelh thei tura theihtawp chhuah turin mipui a sáwm.

Bank-te'n loan an pek dawnin a mamawhtu lam aiin a rûl thei tur an thlir ṭhin tih sawiin K Vanlalvena chuan, "A àwmna chin pawh a awm. Mahse, he policy-in a tum chu, a rûl thei tur ni lo, a mamawhte hnena loan pek a ni. Loan hi 7%-a pung tur a ni a, Mizo mipuite'n he policy hnuaia thil tam tak chu kan dil ve thei a, kan chuh ve a ngai," a ti.