Covid-19 vei enkawl dan fel loh avangin Community spread a thleng ṭan - MPCC

Mizoram Pradesh Congress Committee (MPCC) chuan thuchhuah siamin, Covid-19 veite enkawl dan a fel tâwk loh avangin Mizoramah 'community spread' a thleng ṭan niin an tarlang a, "MNF sorkarin Covid-19 a hmachhawn danah ruahmanna fing a awm loh avangin kan buai chho zel a ni," a ti.

MPCC chuan, Mizoramin Covid-19 a hmachhawn tirh aṭangin a tam thei ang ber test theihna laboratory leh khâwl a ṭul dawn tih a chiang a, hma la turin Congress party-in sorkar an nawr ṭhin tih sawiin, "Covid-19 vanga thla 6 kan buai chhung hian MNF sorkar hian BSL-3 laboratory pakhat pawh a din thei lo," an ti a; mi khawl hawh chawpin an kal mai mai tih an sawi.

Covid-19 dona atana sum hman aiin an duhsak zawngte hnena contract pek MNF sorkarin a duh zawk tlat nia sawiin MPCC chuan, "State sorkar sum an hmang phal lo a, sorkar suma lei tur ni awm tak kháwl chi hrang hrang CM Relief Fund-in an lei a, sorkar din local/village task force enkawl nan ber hman a ni bawk," an ti a; Covid-19 do nan state sorkar sum hman a la ni mang lo tih an tarlang.

Congress party chuan, sorkarin lockdown a puan te, inkhuahkhirhna dan a siamte chu thuawih taka mipuiin an zawm zel laiin, thutlukna felfai lo vanga darkar 24 pawh a liam hmaa thu sût leh a tam hle thu an sawi a, "Covid-19 positive la ni reng chunga CCC aṭanga chhuahtir vang te, ruahmanna fing a awm theih loh vangtein Mizoramah community spread a thleng ṭan mek, an kaina hriat mumal theih loh positive tam tak kan neih phah a ni," an ti.

Congress sorkarin medical college, Referral Hospital leh damdawi lam hmanraw ṭha tak tak a hnutchhiah chunga Covid-19 donaa MNF sorkar a tâlbuai leh community spread a thleng ta chu an hrethiam thei lo tih sawiin MPCC chuan, "Kohhran, NGO leh mipuiin nasa takin ṭanpui lo ila chu, kan dinhmun a chhe lehzual dawn a ni," an ti a; hripui do kawngah sorkar a chak loh avangin sorkara innghat lo a, hripui laka inven kawngah fimkhur lehzual turin mipui an chah a ni.