World AIDS Day hman a ni
Nimin December 1 kha World AIDS Day a ni. He ni pual hian Mizoram State AIDS Control Society (MSACS) bultumin Dawrpui Multipurpose Hall-ah hun hman a ni a, khuallian Health minister Dr R Lalthangliana chuan, theihtawp an chhuah chuan AIDS chu an hneh theih tur thu a sawi. Day hi Women Anti-Drugs Association (WADA) pawhin an centre-ah an hmang ve bawk.
National AIDS Control Organisation (NACO)-in a zirchianna thar ber, India HIV Estimates, 2019 kumina an tihchhuahah chuan, India rama kum 15-49 inkar (adult HIV prevalance) HIV positive percent-ah Mizoram chu 2.32% niin, a sang ber a; pahnihna chu Nagaland (1.45%) niin, pathumna chu Manipur (1.18%) a ni.
Kum tin mi 1,000 zela kái thar awm zat (HIV incidence)-ah pawh India ramah Mizoram chu a sang ber a, mi 1,000 zelah mi 1.18-in an kái anga chhût a ni. Health Minister chuan, Pathianin nunna a pek chu hman pawlawh tur a ni lo tih sawiin, "AIDS hi vanduai vanga kai palh awm ṭhin mah se, a tam ber hi chuan an cho chhuah ni berin a hriat. Hei vang hian AIDS chungchang hi sawi a rem lohna hmun pawh a awm lo a, khawi hmunah pawh inzirtirna kalpui a ngai. Theihtawp kan chhuah chuan kan hneh thei a, tih tak zetin Pathian ṭanpuina dilin i do tlang ang u," a ti.
Kumin kum tìrah AIDS dona kawnga beihpui thlak turin ruahmanna siam a nih thu sawiin Dr R Lalthangliana chuan, "Hma lak ṭan a ni a, Covid-19 a lên tâk avangin tum angin hmalak chhunzawm theih a ni ta lo. Boruakin a zir veleh ruahmanna siam sa tihlawhtling turin thapui nen theihtawp chhuah tum a ni," a ti a; Mizoram tluka sorkar leh mipui thawhhona ṭha khawvel hmun dangah a awm a rin loh thu a sawi.
Health Minister chuan, Covid-19 donaah Mizoramin Pathian kaihhruaina a chan thu sawiin, "Mi zawng zawng tih tak zetin kan ṭawngṭai a, kohhran, khawtlang leh tlawmngai pawlte bakah, sorkar leh mimal angin kan ṭang tlang. India ramah a ti ṭha ber state ni hiala chhuah kan ni. AIDS donaah pawh kan ṭan tlàn a, tih tak zeta kan vei chuan nasa takin awmzia a nei dawn a ni," a ti.
World AIDS Day hmanna inkhawmah hian AIDS Healthcare Foundation (AHF) hmalakna kaltlangin Aizawla taxi driver leh two wheeler taxi driver-te'n AIDS donaa an hman ṭangkai tur hmanrua an sem a ni.
World AIDS Day hi Women Anti-Drugs Association (WADA) chuan Lunglei Chanmari-a an centre-ah an hmang a, Cecilia Lalrindiki'n kaihruaiin, district project officer Lalṭanpuia'n thu a sawi. Lungleia hmannaah hian AIDS vei thite sûn nan bati chhit (candle lighting ceremony) hun hman a ni.