Covid-19 vei pakhat thih belh

Covid-19 vei SRH-ZMC-a enkawl mek Lalbiakenga (41) s/o Saii, Falkland Veng chu nimin zing dar 7:30 khan a thi a, Mizorama Covid-19 vei enkawl lai thi parukna a ni a; nimin khan thlànmualah vui a ni.

Falkland Veng Local Task Force hruaitute hnen aṭanga thu dawn danin, Lalbiakenga hi November 26, 2020 khan Synod Hospital-ah Rapid Antigen Test hmanga a swab sample endiknaah hripui a vei tih hmuh chhuah a ni a, SRH-ah enkawl zui a ni.

SRH-ZMC Bulletin chuan, Lalbiakenga chu natna benvawn nei sa a ni tih tarlangin, "Rei tak natna benvawn chi hran hran nei, in lama lo inenkawl beidawn tawh, dam chhuak lo tura chhungte'n an ngaih vanga in lama an kanna lama Covid-19 hri kái ta a nih hmel a. Amah hi ICU-a enkawl aiin ward-ah a unaupa bula awmtir ve a ni," a ti.