Oil challan inang lo vangin FIR thehlut

Serchhipa PB Lalzuithanga Filling Station-a dah tur tuialhthei September 6, 2020-a phurh thlenah challan-ah inmil lo a awm avangin Serchhipa Legal Metrology, District Consumer Association, YMA Sub-Headquarters leh filling station neitute chuan police station-ah FIR an thehlut.

FIR thehluttute tarlan danin, tuialhthei chu Ramnagar aṭangin September 5-ah tanker MZ-06 5527, Azam Hussain Laskar-a khalh hmangin phurh a ni a, September 6-ah Serchhip thlenpui niin, pump tanky-a dah luh hmain September 7-ah Legal Metrology staff-te'n oil density an endik a ni.

Oil density endiknaah hian oil depot aṭanga oil an lâk hlima IOC-in challan an tihchhuah oil transporter hnena e-mail hmanga an thawn leh tanker driver-in challan a ken chu density a inang lo tih hmuh a ni. Legal Metrology chuan Mizoram bialtu IOC sales manager Alok Vishal Kumar be pawpin, thil awmzia an zawtfiah a, IOC manager chuan e-mail hmanga challan thawn chu a dik zawk thu leh driver challan ken chu a lem a nih a rinawm thu a sawi.