Mizoram sorkarin oil palm chíngtute Kg. 1 zelah Rs. 4.50-in a pui dawn

Agriculture minister C Lalrin­sanga chuan, nimin khan CS conference hall aṭangin video conferencing kaltlangin Lunglei, Kolasib, Mamit leh Serchhipa DAO leh Oil Palm Growers' Society hruaitute hmaah Mizoram sorkarin oil palm chíngtute kg. khat zelah Rs. 4.50-a a puih dawn thu a puang.

Sorkar laipuiin Special Assis­tance for States for Capital Expenditure a ruahman aṭangin Mizoram sorkar chuan oil palm chíngtute puihna tur leh a rah leitu company-te tan cheng vbc. 2.40 a ruahman. Chu sum hmang chuan oil palm chíngtute chu oil palm an hralh hunah kg. 1 zelah company-in a leina bak Rs. 4.50 an pe dawn a, company pawh kg. khat zelah Re. 1 pek a ni ang.

Company-te chuan oil palm rah hi kg. khat Rs. 5.50-in an lei a, sorkar puihna nen oil palm chíngtute chuan kg. khatah Rs. 10 an hlawh thei dawn a ni. C Lalrinsanga chuan, MNF hun hmasa aṭangin Mizoramah oil palm chìn thar a nih thu sawiin, "Rin aiin loneitute an phûr a, chíng duh an tam hle. Loneitute harsatna lian ber chu oil palm hralhna rate ṭha thei lo a ni. Bûkvanneiah factory din a ni a, thar chhuah lak khawm duh angin a chak thei lo a, theih ang ang la khawmin her a ni," a ti. 

Oil palm chíngtute chu price support kg. khatah Rs. 2 pek an nih ṭhin thu sawiin Minister chuan, "Kan sorkar leh hnuah pawh pek chhunzawm a ni a, mahse, sum harsatna avangin duh ang thálin loneitute kan pui thei lo. Central ministry kan dàwr a, chuta ṭang chuan price support kg. 1 zelah Rs. 4.50 kan pe dawn a ni," a ti a; Rs. 4.50 chu January 2021 aṭanga pek ṭan a nih dawn thu a sawi.

C Lalrinsanga chuan, company leh loneitute'n fûr laiin link road an hman theih loh avangin harsatna an tâwk tih an hriat thu sawiin, "Kawng a ṭhat loh avang hian transportation cost a sàn phah. Kumtluana hman thei turin FOCUS aṭangin rigid pavement hmanga tih kan tum. Vawi leh khatah a tih theih vek dawn lo a, a tahtawla tih kan tum," a ti.

Planning Board vice chairman H Rammawi chuan, Mizorama thlai chìn zingah a hralhna awm sa awmchhun a nih avangin Mizoram sorkarin oil palm a dah pawimawh tulh tulh dawn nia sawiin, "Oil palm hi chhungkaw tam takin an hlâwkpui tawh a ni," a ti a; oil palm chíngtute harsatna sutkian zel tum a nih thu a sawi.