Winter Fair cum Flower Show

Horticulture department leh Mizoram Florists Association chuan nimin khan Aijal Club Park-ah 'Winter Fair cum Flower Show' an buatsaih ṭan a, Horticulture minister Prof. Lalnilawma'n a hawng. Fair cum Show-ah hian stall 96 a awm a, pangpar leh a kaihhnawih hmarua chi hrang hrang lei theiha pho chhuah a ni a; November 22, 2024 thleng buatsaih a ni ang. 

Prof. Lalnilawma chuan, fair buatsaih chu pangpar lama eizawngte leh tui mite tan hlâwkthlak tak a nih a beisei thu sawiin, "Pangpar chìn hi Horticulture hnuaia péng pawimawh tak pakhat a ni a, kawng hrang hrangin hmasawnna awm zel se ka duh," a ti a; Mizoram timawi zel tura thawhhopuiah Mizoram Florists Association a sáwm.

Mizoram Florists Association hi November 16, 1997 khan din a ni a, Mizoram Society Registration Act hnuaiah kum 1998 khan an inziak lut. Aizawl headquarters-ah member 500 vel an awm a, district hrang hrangah branch 27 an nei a ni.

LAWMMAN 1-NA DAWNGTUTE

Mass Arrangement - Lallianthangi

Artistic - Liansangpuii

Ikebana - Liansangpuii

Perenial A - Lallianthangi

Perenial B - Lalthanchhungi

Seasonal A - Lalrotluangi

Seasonal B - Zothanpari